काठमाडौं - नेपाली फिल्म ‘हेल्लो जिन्दगी’ मा समावेश ‘अनौठो माया’ बोलको रोमान्टिक गीत सार्वजनिक भएको छ ।
चैत्र १८ गते प्रदर्शन हुने फिल्म ‘हेल्लो जिन्दगी’ मा समावेश भएकाे विक्रम र दीपीकाकाे फिचर्ड अनौठो माया बोलको रोमान्टिक गीत मंगलबार राजधानी आयोजित प्रेसमिटमा सार्वजनिक भएको हाे ।
साे गीत एड्रिन प्रधान र रजिना रिमालको स्वर रहेकाे छ । गीतमा अभिनेता विक्रम डि जोशी र दीपीका प्रसाईंकाे रोमान्टिक अभिनय रहेकाे छ ।
निर्देशक एभरेष्ट सुर्य बोहराकै शब्द र अमित श्रेष्ठको संगीत रहेको गीतको कोरियोग्राफी बलिउडका कोरियोग्राफर विष्णु देवाले गरेका हुन् ।
कार्यक्रममा फिल्मकी कार्यकारी निर्मात्री सृजना जोशी महर्जनले ‘हेल्लो जिन्दगी’ सत्य घटनाहरुबाट प्रभावीत भइ निर्माण गरिएकाले दर्शकको मन जित्ने विश्वास लिएको बताइन् । अभिनेता विक्रमले आफूहरुले गुणस्तरिय फिल्म निर्माणमा कुनै कन्जुस्याइँ नगरेको बताए ।
उनले भने,‘हाम्रो फिल्ममा नेपाल, भारत र युके,तीन देशका प्राविधिकको मिहेनत परेको छ । दर्शकसामु उच्च कोटीको फिल्म प्रस्तुत गर्नका लागि हामीले अत्यन्तै मिहेनत गरेका छौँ । त्यसैले दर्शकले मन पराउनेमा विश्वस्त छु ।’
कार्यक्रममा फिल्मकी सहनिर्मात्री तथा अभिनेत्री सबिता गुरुङले आफूहरुले यो फिल्म पूरा गर्न निकै संघर्ष गरेको स्मरण गर्दै सफलता प्राप्त हुनेमा ढुक्क रहेको बताइन् ।
महारानी इन्टरटेन्मेन्ट युके र एभरेष्ट सूर्य बोहरा फिल्मस्सँगको सहकार्यमा बिरञ्जना इन्टरटेन्मेन्टको प्रस्तुति रहेको फिल्ममा डि क्रिएटिभ स्टुडियो,युके र काम्मा इन्टरटेन्मेन्ट,इन्डिया लाइन प्रोड्युसर छन् ।
सुदीप कुँवर र मार्लाेभ ढुंगाना मुख्य सहायक निर्देशक रहेको फिल्मको कथा निर्देशक बोहरा र विक्रम डि जोशीको हो भने पटकथा,सम्वाद निर्देशक बोहरासहित अभिमन्यु निरवीले तयार पारेका हुन् ।
पुरुषोत्तम प्रधानले खिचेका यस फिल्मलाई आरआर फिल्मस्ले वितरण गर्दैछ ।
