वीरगञ्ज - गैरनाफामूलक संस्था राउन्ड टेबल नेपालले वीरगञ्जकाे छपकैया वडा नं. ३ मा सुविधा सम्पन्न कक्षाकोठा ताराचन्द किसन लाल आधारभुत विद्यालयलाई हस्तान्तरण गरेकाे छ ।
विद्यालयको भवनमा एक कार्यक्रमको आयोजना गरी वीरगञ्जस्थित टेबल नं ८ र १३ को संयुक्तमा नव निर्मित ४ वटा कक्षा कोठालाई टेबल नेपालका केन्द्रिय अध्यक्ष आनन्द बाहेतीले विद्यालयलाई हस्तान्तरण गरेका हुन् ।
छपकैयामा नवनिर्मित कक्षाकोठाबाट विद्यार्थी लाभान्वित हुने राउण्ड टेबलले विश्वास लिएकाे छ।
आइतबार राउण्ड टेबल ८ का अध्यक्ष दिपल खन्ना र राउण्ड टेबल १३ का अध्यक्ष चिराग अग्रवालको संयुक्त अध्यक्षतामा भएको उक्त कार्यक्रममा विगत तीन महिना पहिला विद्यालयमा २६ लाख बराबरको भौतिक पुर्वाधार निर्माण गर्ने अनफुहरुको आयोजना अन्तर्गत आज ४ वटा कक्षाकोठा र सोको लागि कुर्सी, टेबल, कालोपाटी, आदि सहित निर्माण गरी हस्तान्तरण गरिएकाे राउण्ड टेबल नेपालका सदस्यले बताए ।
राउण्ड टेबल नेपाल, नेपालको गैरनाफामूलक संस्थाले देशका विभिन्न जिल्लाहरुमा शिक्षा र स्वास्थ्य क्षेत्रमा सामाजिक काम गरिरहेको छ ।अहिलेसम्म ३४८ कक्षा कोठासहित ५८ वटा विद्यालय निर्माण गरिसकेको संस्थाले दाबी गरेकाे छ
राउण्ड टेबल इन्टरनेशनलसँग आवद्ध सन् १९९९ मा स्थापना भएको राउण्ड टेबल नेपाल, नेपालभर अहिलेसम्म ३० च्याप्टरमा कुल ४५३ सदस्य रहेकाे जनाएकाे छ । संस्थाका अनुसार १८ देखि ४० वर्ष उमेर समूहका युवाहरु मात्रै सक्रिय रहन पाउने राष्ट्रिय परियोजना “फ्रिडम थ्रू एजुकेसन” पनि सञ्चालन गरिरहेको छ ।
संस्थाले शिक्षा क्षेत्रमा देशको कुनै पनि स्थानमा विद्यालय सञ्चालन गर्न आवश्यक भौतिक पूर्वाधार (समग्र विद्यालाय भवन) देखि आवश्यकता अनुसार शिक्षा सामाग्री, कम्प्युटर, लाइब्रेरी र ल्याब निर्माण गर्दै आएको जनाएकाे छ ।
त्यसैगरी कोरोना महामारीका प्रोजेक्ट लाइफ लाइन अन्र्तगत विरामीहरुलाई लक्षित गर्दै संस्थाले लगभग ३५ लाख बरावरको ३५ भिप्याप मेसिन विभिन्न अस्पतालहरुलाई हस्तान्तरण गरेको थियो ।
