काठमाडौं– मान्छे केही न केही गरिरहने प्राणी हो । त्यसमा पनि कलाकार भएपछि रचनात्मक हुने नै भयो । यस्तै रचनात्मक सोचलाई निर्वाणा आर्ट ग्यालरीका प्रमुख कलाकार बेखराम बलामीले एउटा कला सिर्जना गर्ने सोच फुराए, र खाएर फ्याँकिएको चुरोटको ठूटाहरूले बनाए चलचित्र चिसो एष्ट्रेका लेखक भूपि शेरचनको तस्बिर ।
कवि शेरचनको कवितामा आधारित चलचित्र ‘चिसो एष्ट्रे’ ले खुब चर्चा बटुल्यो । होलीको रमझमको अवसरमा प्रदर्शनमा आएको चलचित्र चिसो एष्ट्रेको कथा भन्ने तरिका, कलाकारको अभिनयलाई दर्शकले मन पराए । २०७१ सालदेखि नै उक्त चलचित्र बनाउने तयारीमा निर्माण समूह जुटेको थियो । २०७८ सालमा आएर दर्शकमाझ आएको उक्त चलचित्रको प्रचारमा पनि निर्माण समूहले नौलो अभ्यास गरेको चर्चा पनि राम्रै चलेको थियो ।
काठमाडौं उपत्यकालाई कवि शेरचनले एक एष्ट्रेको रूपमा बखान गरेका थिए, कविताका हरफहरूमार्फत । खाएर बाँकी रहेको चुरोट राख्ने भाँडा नै ‘एष्ट्रे’ हो । चलचित्र चिसो एष्ट्रे निर्माण समूहले चर्चित कवि शेरचनको पोट्रेट चित्र नै चुरोटको ठूटाले बनाउने निधो गर्दै कलाकार बिआर बलामीको सम्पर्कमा पुगे ।
कलाकार बलामीले पनि इन्स्लेसन (प्रतिस्थापन) कला अन्तर्गत कवि शेरचनको चित्र तयार गरी चलचित्र निर्माण समूहको सिर्जनात्मक प्रस्तावलाई पूरा गरिदिए । उनले यस सिर्जनाको काममा कलाकारहरू राहुल राई, सन्दीप गोले, लीलाधर केसीलगायतले सघाएको बताए । कवि शेरचनको पोट्रेट चित्रका लागि चुरोटका ठूटाहरू सन्तोष श्रेष्ठ यात्रीले उपलब्ध गराएका थिए । उनले चलचित्रको प्रचारका लागि यस किसिमको प्रयोग नौलो सोच अघि बढाएका हुन् ।
कलाकारिताको ३० वर्षमा यो फरक प्रयोग भएको उनले बताए । त्यसैगरी सन्तोषले पनि यात्राको क्रममा भेटिएको चुरोटको ठूटोलाई संकलन गरेर पहिलो प्रयोगको रूपमा कवि शेरचनको चित्रका लागि निःशुल्क उपलब्ध गराएका थिए । उनले करिब एक हजार ६०० वटा चुरोटको ठूटाले उक्त चित्र बनेको बताए ।
