काठमाडौं – सुनको भाउ बढेसँगै कारोबार घटेको छ । कोरोना भाइरसको महामारी अघि वैशाख महिनामा सुनको कारोबार दैनिक ५० किलोसम्म हुने गरेको थियो ।
अहिले विवाहको लगन भए पनि भाउ बढेका कारण २५ देखि ३० प्रतिशतले कारोबार घटेको नेपाल सुन चाँदी व्यवसायी महासङ्घले जनाएको छ । विवाह, व्रतबन्धको लगन भएका बेला दैनिक ५० किलोसम्म सुनको कारोबार हुने गरेकोमा अहिले २५ देखि ३० प्रतिशतले घटेको महासङ्घका पूर्व अध्यक्ष तेजरत्न शाक्यले बताए ।
यस्तै, आयात रोकिँदा अहिले बैंकमा सुनको मौज्दात सकिएको छ । गएको चैत २१ गते नेपाल राष्ट्र बैंकले एलसी नखोल्न बैंकहरुलाई निर्देशन दिएपछि आयात रोकिएको हो । यसले गर्दा बैंकहरुमा मौज्दात सकिएको शाक्यले बताए ।
चैत २१ गते अघिसम्म बैंकहरुले दैनिक १० किलो सुन आयात हुने गरेको थियो। अहिले आयात रोकिँदा नयाँ गरगहना बनाउन समस्या पर्ने भएको छ । तत्काललाई माग अनुसारको गरगहना बनाउन समस्या नदेखिए पनि आयात रोकिँदा आउने दिनमा असर पर्ने नेपाल सुन चाँदी व्यवसायी महासङ्घका शाक्यले बताए ।
यसैबीच, सुनको भाउ फेरि बढ्ने अनुमान गरिएको छ । सुनको भाउ अहिले तोलामा एक लाख दुई हजार रुपैयाँ छ ।
