काठमाडौं - सत्तारुढ दल नेपाली कांग्रेसनिकट वैदेशिक रोजगार व्यवसायीहरूको संस्था नेपाल लोकतान्त्रिक वैदेशिक रोजगार व्यवसायी एसोसियसनको साधारणसभा आज हुँदै छ । दुई वर्षको लागि नयाँ कार्यसमिति चयनसमेत गर्ने अधिवेशनको सम्पूर्ण तयारी पूरा भएको एसोसियसनका अध्यक्ष नरेन्द्र ढकालले जानकारी दिएका छन् ।
साधारणसभामा नयाँ नेतृत्व चयनका लागि मतदान हुने अवस्था देखिएको बताइएको छ । अहिलेसम्म अध्यक्ष पदका लागि दुई जना आकांक्षी देखिएका छन् । अध्यक्ष ढकालले पनि चुनाव हुने सम्भावना बढेको बताए । अन्तिम सययसम्म सहमतिको प्रयास गरिने र नभएमा लोकतान्त्रिक पद्धतिबाट नेतृत्व चयन हुने उनको भनाइ छ ।
आगामी कार्यकालका लागि अध्यक्षमा तारानाथ अर्याल र ऋषि शर्मा आकांक्षी रहेको बताइएको छ । उनीहरू प्यानल नै खडा गरेर प्रतिस्पर्धा गर्ने योजनामा लागेको बताइएको छ । महाधिवेशनमा करिब ३५० प्रतिनिधि सहभागी हुने अध्यक्ष ढकालले बताए ।
अघिल्लो साधारणसभामा समेत ३५० वटा म्यानपावर कम्पनीले प्रतिनिधि पठाएका थिए । अहिले पनि सोही हाराहारीमा प्रतिनिधिको नाम प्राप्त भएको एसोसियसनले जानकारी दिएको छ । वैदेशिक रोजगार विभागको तथ्यांकअनुसार हाल वैदेशिक रोजगार व्यवसाय सञ्चालन गर्ने कम्पनी ८६० वटा रहेका छन् ।
प्रकाशित मिति: बुधबार, वैशाख ७, २०७९ ०८:१९
