काठमाडौं– करण जोहरले १९ वर्षदेखि सञ्चालन गर्दै आइरहेको चर्चित टेलिभिजन टक शो ‘कफी वीथ करण’ सदाकोलागि बन्द भएको छ ।
जोहरले सामाजिक सञ्जालमार्फत कार्यक्रम बन्द भएको घोषणा गरेका हुन् ।
स्टार वर्ल्ड इन्डियाले नोभेम्बर १९,२००४ मा कफी वीथ करणको पहिलो एपिसोड प्रिमियर गरेको थियो । करण जोहरले आयोजना गरेका यो शोको सिजन–६ को अन्तिम एपिसोड मार्च १७, २०१९ मा प्रसारित भएको थियो ।
सिजन–७ मा नव विवाहित रणवीर कपूर र आलिया भट्ट शोमा पहिलो अतिथि हुने अपेक्षा गरिएको थियो । तर, करणको यो ‘महत्त्वपूर्ण घोषणा’ले सबै अनुमानलाई अन्त्य गरिदिएको छ ।
उनले आफ्नो सामाजिक सञ्जालमा लेखेका छन् ‘कफी वीथ करण मेरो र तपाईँको जीवनको ६ सिजनको महत्त्वपूर्ण हिस्सा बनेको छ। मलाई थाहा छ कि कि हामीले यो शो द्वारा धेरै प्रभाव पारेका छौँ र पप संस्कृतिको इतिहासमा पनि आफ्नो स्थान पाएका छौँ।
त्यसैले भारी हृदयका साथ म यो घोषणा गर्छु कि कफी वीथ करण अब फिर्ता हुने छैन ।’
यो घोषणाले कफी वीथ करणका धेरै फ्यानहरूलाई निराश बनाएको छ ।
