धनुषा– नेकपा माओवादी केन्द्रका अध्यक्ष पुष्पकमल दाहालले नेकपा एमालेका कारण नागरिकताको समस्या समाधान हुन नसकेको बताएका छन् ।
शनिबार धनुषाको मिथिला नगरपालिकास्थित ढल्केबरमा आयोजित चुनावीसभालाई सम्बोधन गर्दै नेकपा एमालेका कारण नागरिकताको समस्या समाधान हुन नसकेको बताएका हुन् ।
उनले अहिले एमालेले सामन्ती र राजावादी तत्वसँग गठबन्धन गरेको भन्दै दाहालले एमालेले समानुपातिक, समावेशी सिद्धान्त र संघीयता विरोधीसँग गठबन्धन बनाएको टिप्पणी गरे । ‘आउने निर्वाचन खाली एउटा सामान्य निर्वाचन होइन, जनताले जित्ने कि जनताको बैरीले जित्ने भन्ने लडाईं हो,’ उनले भने ।
उनले मधेसी जनताको माग अनुसार विगतमा आफू प्रधानमन्त्री हुँदा संविधान संशोधन प्रस्ताव संसदमा पेश गर्दा एमालेकै कारण असफल भएको बताए ।एमालले संसद् चल्न नदिएका कारण नागरिकताको समस्या समाधान नभएको उनको भनाई थियो ।
उनले एमालेले नै संसद् चल्न नदिएको कारण नागरिकता सम्बन्धि बहस संसद्मा हुन नसकेको र त्यसैले नागरिकताको समस्या समाधान गर्न ढिला भइरहेको गुनासो गरे ।
अध्यक्ष दाहालले बुवाआमाको नागरिकता भएर पनि छोराछोरीको नागरिकता प्राप्त गर्न नसक्नु गम्भिर विषय भएको भन्दै अदालतले अध्यादेश ल्याएर हैन संसद्को अधिवेशन भित्रैबाट छलफल गरेर नागरिकताको समस्या हल गर्ने बताए । उनले भने, ‘अब सदन खुल्ने बित्तिकै सबैभन्दा पहिले एमालेले माने पनि नमाने पनि नागरिकताको समस्या समाधान गर्नेछाँै ।’ उनले यसलाई सदनबाट नै सम्बोधन गर्ने बताए ।
उनले मधेसी जनताको अधिकारका निम्ति अन्तिमसम्म पनि संघर्ष गरिरहने बताए । उनले मधेस र मधेसी जनताले सुखदुःखको साथी माओवादी केन्द्र नै भएकाले उनले मधेसी जनताकै मत पाएर आफू दोस्रोपटक प्रधानमन्त्री बन्न सकेको बताए ।
अध्यक्ष दाहालले २०७० को निर्वाचनमा मधेसबाटै लडेको र मधेसी जनसमुदायको मत पाएरै आफू निर्वाचित भएको पनि स्मरण गराउँदै भने, “मैले २०७० को निर्वाचन मधेसबाटै लडें, मधेसी जनसमुदायको मत पाएरै निर्वाचित पनि भएँ र दोस्रोपटक प्रधानमन्त्री पनि मधेसी जनताको मतकै कारणले भएँ । अब हामी तेस्रो निर्वाचन प्रक्रियामा प्रवेश गर्दैछौँ, यो निर्वाचनमा मधेसले नयाँ रेकर्ड, नयाँ उदाहरण
पेश गर्नुपर्नेछ ।’
प्रकाशित मिति: आइतबार, वैशाख २५, २०७९ ०८:५३
