काठमाडाैं - नेपालको एक अन्तर्राष्ट्रिय वायुसेवा कम्पनी हिमालय एअरलाइन्स्ले लगातार छैटौं वर्ष प्रयास नेपालका बाल-बालिकालाई वर्षभरीको शैक्षिक सामाग्रीसहित आफ्नो सहयोग प्रदान गरेको छ। संस्थागत सामाजिक उत्तरदायित्वअन्तर्गत काठमाडौँमा एक विशेष कार्यक्रमकाबीच मगंलबार हिमालय एअरलाइन्स्ले प्रयास नेपालका बालबालिकाहरुलाई सहयोग सामाग्रीहरुको हस्तान्तरण सम्पन्न गरेको हो ।
नयाँ शैक्षिक सत्रको प्रारम्भसँगै त्यन्तै प्रतिक्षित अनुदान एक गैरसरकारी, गैरनाफामूलक र सामाजिक संस्था प्रयास नेपालका २६ जना कलिला र जोसिला बालबालिकालाइ प्रदान गरिएको जनाइएको हो । बालबालिकामा उड्डयन उद्योग, पेशा र व्यावसायिक पाठ्यक्रमहरू आदि बारे चेतना जगाउने उद्देश्यका साथ यस वर्ष हिमालयले बालबालिकाका लागि अनुभव आदान-प्रदान गर्न एक विशेष शैक्षिक सत्रको आयोजना गरेको थियो ।
विगतका वर्षहरुमा आवश्यक शैक्षिक सामाग्री, खाजा र नास्ता, खाद्यान्नहरूका साथै कोभिड-१९ विरुद्धका सामाग्रीहरुको आपूर्तिमार्फत निरन्तर सहयोग गर्दै आएको हिमालय एअरलाइन्स्ले जनाएको छ। यसक्रममा हिमालय एअरलाइन्स् का जहाजका अनुभवी चालकदलले बालबालिकासँग अन्तरक्रिया गरेका थिए । उक्त सत्रको उद्देश्य यी बालबालिकाहरुमा उड्डयन उद्योगबारे ज्ञानको दायरा बढाउनुका साथै नेपालको उड्डयन क्षेत्रमा रहेका विभिन्न पाठ्यक्रम र पेशाका अवसरहरु बारे जानकारी गराउने बताएका छन् ।
शैक्षिक सामाग्रीमा विभिन्न कक्षाका लागि शैक्षिक पाठ्यक्रमका पुस्तक, नोटबुक, रजिष्टर र क्यालकुलेटर, ज्यामिति बक्स, कलमलगायत स्टेशनरी सामाग्रीहरु समेटिएका थिए । एअरलाइन्स्को तर्फबाट शैक्षिक सामाग्री हस्तान्तरण गर्दै ब्रान्ड विभाग प्रमुख श्रीमती उज्ज्वला दलीले भने “हाम्रा प्रमुख संस्थागत सामाजिक उत्तरदायित्वमध्ये समाज सेवा पनि एक हो । प्रयास नेपालसँगको हाम्रो छ वर्ष लामो सहकार्यले हाम्रो उत्तरदायित्व पुष्टि गरेको छ ।
यो विशेष सहकार्य हरेक वर्ष अझ बलियो बन्दै गएको छ। प्रयास नेपालको १९ औं वार्षिकोत्सवको उपलक्ष्यमा हामी प्रयास नेपालका सम्पूर्ण टोली र बालबालिकाहरूलाई हार्दिक शुभकामना व्यक्त गर्न चाहन्छौं। विशेषत, हामी अत्यन्तै खुशी छौं किनभने हामीले यस वर्ष युवा पुस्तालाई प्रेरित गर्ने र उनीहरूको भविष्य निर्माणका निम्ति असीमित सम्भावनाहरू खोज्न मद्दत गर्ने उद्देश्यका साथ हाम्रा नियमित सहयोग वाहेक आफ्ना ज्ञान र सीपहरु आदान प्रदान गर्ने शैक्षिक कार्यक्रमको आयोजना गर्ने प्रयास गर्न पायौं ।'
प्रकाशित मिति: बुधबार, वैशाख २८, २०७९ १३:५४
