काठमाडौं– सुदूरपश्चिम प्रदेशको एकमात्र उपमहानगरपालिका धनगढी उपमहानगरपालिकाको प्रमुख पदमा स्वतन्त्र उम्मेदवार गोपाल हमाल निर्वाचित भएको छ। हमालले १२ हजार बढी मतले निर्वाचित भएका हुन ।
मुख्य निर्वाचन अधिकृतको कार्यालयका अनुसार स्वतन्त्र उम्मेदवार हमालले २६ हजार ८६५ मत प्राप्त गरेको छ भने उनका निकटतम् प्रतिस्पर्धी गठबन्धनका साझा उम्मेदवार नेपाली कांग्रेसका नृपबहादुर वडले १४ हजार ८१७ मत प्राप्त गरेको छ । यस्तै प्रमुखमा नेकपा (एमाले) का रणबहादुर चन्दले नौ हजार ११५ मत प्राप्त गरेको छ ।
उपप्रमुखमा नेकपा (एमाले) का उम्मेदवार कन्दकला राना निर्वाचित भएको छ । उनले १५ हजार ४७९ मत प्राप्त गरेको छ भने गठबन्धनका तर्फबाट नेकपा (माओवादी केन्द्र) का उम्मेदवार शान्ति अधिकारीले १२ हजार ६७० मत प्राप्त गरेको छ ।
उप्रमुखका स्वतन्त्र उम्मेदवार प्रभाकर भण्डारीले छ हजार ६०९ मत प्राप्त गरेको छ । ९३ हजार १५१ मतदाता रहेको उपमहानगरपालिकामा ६३ हजार ६४७ मत खसेको मुख्य निर्वाचन अधिकृतको कार्यालयले जनाएको छ ।
प्रकाशित मिति: आइतबार, जेठ ८, २०७९ १०:२६
