काठमाडौं- पुख्र्यौली घर स्याङ्जा तर छिमेकी मुलुक भारतमा जन्मिएकी प्रतीक्षाको हुर्काइ भने रूपन्देहीको सैनामैना । रूपकी रानी । सानैदेखि नाच्न गाउन भनेपछि हुरुक्कै र खप्पिस पनि । तर, आफूलाई विस्तारै नाच्नभन्दा पनि गाउनतिर ढल्काइन् ।
स्कूल पढ्दै गर्दा लोक गायन विधामा विभिन्न प्रतियोगितामा पुरस्कार हात पार्न सफल । सुरुका दिनमा घर परिवारबाट गायनभन्दा पनि पढाईमा जोड दिन गरेको बललाई पाखा लगाउँदै उनी गायनमै लागिन् । प्रतीक्षाले जब पुरस्कारसहित घर पुग्थिन् अनि पाउँथिन् स्याब्बासी, अनिमात्र घरमा थाहा हुन्थ्यो गाएर जितेकी भन्ने कुरा । प्रतियोगितामा लगातार पुरस्कार अनि घरबाट विस्तारै गाली कम हुन थालेपछि प्रतीक्षाले नाच्नभन्दा गाउनमै अघि बढिन् ।
उमेरसँगै कक्षा चढ्दै गएपछि प्रतीक्षाको प्रतिभालाई बजारमा ल्याउने काम गरे बर्दियाली कमल बिसी ‘माइलादाई’ले । माइलादाईसँगको संगत प्रतीक्षाका लागि सफल सावित भयो, उनै माहिलादाईसँग मिलेर २०७४ सालको तिजमा रातो सारी नाम गीत बजारमा ल्याएकी प्रतीक्षाले त्यसपछि लगातार रूपमा नेपालका चर्चित कलाकारहरूसँग सहकार्य गर्ने सौभाग्य पाइन् ।
तेजस रेग्मी, उज्ज्वल गिरी, राजन कार्की, सन्तोष केसी, विशाल रायमाझी, रञ्जीत परियारलगायतका कलाकार उनका अहिलेसम्मका सांगीतिक सहयात्राका साथी हुन् भने कमल बिसी सारथी । जसले प्रतीक्षाको लोक सांगीतिक चाहको विजलाई मलजल गर्दै अगाडि बढाइरहे ।
सांगीतिक यात्राको प्रवेशसँगै हरेक वर्षका तिजमा आफना सिर्जनालाई दर्शक स्रोतामाझ ल्याईरहेकी प्रतीक्षाले लकडाउनका समयमा भने आफू केही सुस्ताएको बताइन् । सिर्जनाका हिसाबले त्यही समय बढी सिर्जना गरेको बताए पनि बजारमा पस्कनका लागि आर्थिकका साथै अन्य विभिन्न कारण बाधक बनेको प्रतीक्षाको ठहर छ ।
सुरुका दिनमा सोखमा रूपमा गीत गाएकी प्रतीक्षाले अबका दिनमा भने पेशा बनाउन लागि परेकी छिन् । सांगीतिक क्षेत्रका अलावा व्यापार व्यवसायलाई अगाडि बढाइरहेकी प्रतीक्षाले कतिपय अवस्थामा ‘सोख’लाई ‘पेशा’ले जितेको बताइन् । जसका कारण आफूले चाहे र सक्नेजति बजार आउन नपाएको बताउँछिन् । राजन कार्कीसँग गाएको मायाको हाई हाई बोलको गीतमा नेपाली डान्सका नम्बर एक अभिनेता दिलीप रायमाझी र डान्सिङ क्वीन कविता नेपालीलाई सँगै नचाएकी छिन् ।
त्यस्तै विशाल रायमाझीसँग गाएको संगिनी नाम गीत प्रतीक्षाको अर्को खुड्किलो सावित भएको छ । संगिनी गत वर्षको तिजमा प्रतीक्षा र विशालले ल्याएका थिए । विशालसँगको सहकार्यमा नारीहरूको संवेदनाका साथै वास्तविकतालाई समेटिएको कमेडी गीत प्रतीक्षालाई चिनाउने अर्को सिर्जना बनेको छ ।
लुती, टिनको बाकस, बगेको खोला, टिकटक कि हिरोइन, दशैं मनाउन आउँदै छौं उनका अन्य सिर्जना हुन् । जुन नेपाली लोक बजारमा फरक पहिचान बनाउन सफल बनेका थिए ।
नेपाल तथा भारतका विभिन्न सहरमा गीत गाउनकै लागी पुग्नु प्रतीक्षाको अर्को सफलता हो, जसबाट दर्शकसँग नजिकिने मौका उनले गुमाइनन् । जसले गर्दा मधुर स्वरकी धनी प्रतीक्षा स्टेज शोबाट राम्रो पर्फमरका रूपमा पनि चिनिन थालिन् ।
गायनको छोटो समयको औपचारिक प्रशिक्षण प्रतीक्षाका लागि बजारमा स्थापित हुन केही सहयोगी सिद्ध भएको अनुभव उनमा छ । प्रशिक्षण अघिभन्दा आफैंलाई खारिएको अनुभव गरेकी प्रतीक्षाले अब विस्तारै व्यापारलाई भन्दा गायनलाई अगाडि बढाउने सुर कसेकी छिन् ।
भावी योजनाका बारेमा प्रतीक्षाले भनिन् तत्कालका लागि आउनै लागेको तिजलाई प्राथमिकतामा राखेकी छु । अहिलेसम्म आउने तिजका लागि दुई कोसेली तयार भइसकेको बताएकी प्रतीक्षाले यसपटक पुनः आफनो लागि लक्की सावित कमल बिसीका साथमा आउने बताएकी छिन् भने रञ्जीत परियारसँगको गीतमा पनि ठूलो आशावादी छिन् ।
अब बिस्तारै सांगीतिक यात्रामा थप तीब्रता दिने योजनासहित प्रतीक्षा मोडलिङतिर पनि लाग्ने बताउँछिन् । लकडाउनका बेला आफूलाई खासै ‘मेन्टेन’ गर्न नसकेकी प्रतीक्षा विस्तारै ‘मेन्टेन’ गर्दै आफनो गीतमा आफैं अभिनय गर्न समेत कम्मर कसेकी छिन् ।
आउनै लागेको तीज गीतको काम अन्तिम चरणमा पुगिसकेको बताएकी प्रतीक्षा लाइभ दोहोरीमा भने अहिलेसम्म खासै भाग नलिएको बताउँछिन् । व्यावसायले गर्दा खासै समय दिन नसकेकी प्रतीक्षाले अब व्यावसायलाई अर्कैको जिम्मा लगाउँदै सांगीतिक क्षेत्रमा पूर्णरूपमा होमिने जनाएकी छिन् । जसले गर्दा आउने दिनमा उनको उपस्थिति नेपाली सांगीतिक बजारमा प्रभावशाली बन्ने देखिन्छ ।
प्रकाशित मिति: बिहीबार, असार १६, २०७९ १२:१८
