काठमाडौं– पछिल्लो समय दिनैजसो अवार्डहरू भइरहेका छन् । यसरी दिनदिनै हुने विभिन्न नामको अवार्डहरू भने अलोकप्रिय बन्न थालेको छ । यसैबेला नेपाली गीतसंगीत क्षेत्रका मेगास्टार राजेशपायल राईले भने ‘अवार्ड नलिने’ घोषणा गरेका छन् । एक अवार्ड समारोहका सहभागी भइरहेकै बेला उनको यस्तो भनाइ आएको हो ।
केही समयअघि मात्र आफ्नो घरमा आगलागी हुँदा उनले प्राप्त गरेका सबै अवार्डहरू जलेर नष्ट भएको थियो । त्यसपछि पनि गायक राजेशपायलले केही अवार्ड प्राप्त गरेका छन् । तर, राजेशले अब उप्रान्त अवार्ड नलिने उनले घोषणा गरेका छन् ।
उनले राज्यस्तरबाट दिने वा अन्तर्राष्ट्रिय मान्यताप्राप्त अवार्डबाहेक निजी वा व्यक्तिगत रूपमा प्रदान गरिने अवार्ड नलिने बताएका छन् । सामाजिक सञ्जाल फेसबुकमा स्टाटस लेख्दै उनले यस्तो घोषणा गरेका हुन् ।
‘हामी कलाकारका लागि दर्शक तथा श्रोताहरूको माया, सद्भावले विशेष महत्व राख्दछ । नयाँ कलाकारहरूलाई प्रेरित गर्न पनि हामीले उनीहरूका लागि बाटो छाडिदिनुपर्छ भने अवार्डहरूको गरिमा तथा महत्व पनि कायम रहनुपर्दछ’ उनले लेखेका छन् ।
राजेशपायलले अवार्डले आफ्नो करिअरमा महत्वपूर्ण भूमिका निर्वाहा गरेको उल्लेख गर्दै भनेका छन्, ‘लाइफ टाइम एचिभमेन्ट र सम्मान’ भने ग्रहण गर्नेछु ।’ स्मरणीय के भने नेपाली फिल्म तथा गीतसंगीत क्षेत्रमा सबैभन्दा धेरै अवार्ड राजेशपायलले पाउने गरेका छन् ।
