ताप्लेजुङ- ताप्लेजुङको फुङलिङ नगरपालिकामा नगर परिषद्ले पास गरेको बजेटमा कुनै शंसोधन नभए बाल शिक्षक,कार्यालय सहयोगी र विद्यालय कर्मचारी (लेखापाल) ले साविक खाइपाइ आएको तलबमा बढीमा ३३ र कम्तिमा साढे ३ प्रतिशतसम्म कटौती हुने भएको छ ।
फुङलिङ नगरपालिकामा ५४ जना बाल शिक्षक,४९ जना कार्यालय सहयोगी र ८ जना विद्यालय कर्मचारी रहेको फुङलिङ नगरपालिकाका शिक्षा अधिकृत प्रकाश पौडेलले जानकारी दिए ।
पौडेलका अनुसार चालू आर्थिक वर्षसम्म बाल शिक्षक र कार्यालय सहयोगीका लागि नगरपालिकाले संघ सरकारबाट प्राप्त अनुदानमा मासिक जनही ७/७ हजार र विद्यालय कर्मचारीका लागि १ हजार ५ सय रुपैयाँ थप गरी तलबभत्ता निकासा गर्ने गरेको थियो । संघ सरकारबाट शिक्षक र कार्यालय सहयोगीका लागि मासिक जनही ८/८ हजार रुपैयाँ अनुदान आउने गरेको थियो । विद्यालय कर्मचारीका लागि भने संघ सरकारबाट मासिक जनही १३ हजार ५ सय रुपैयाँ प्राप्त हुने गरेको थियो ।
संघ सरकारबाट प्राप्त हुने ८/८ हजार मासिक अनुदानमा नगरपालिकाले बाल शिक्षक र कार्यालय सहयोगीलाई जनही मासिक ७र७ हजार थप गरी मासिक जनही १५/१५ हजार रुपैयाँ दिने गरेको थियो ।
विद्यालय कर्मचारीलाई भने संघबाट प्राप्त हुने मासिक जनही १३ हजार ५ सय रुपैयाँमा मासिक जनही १ हजार ५ सय थप गरेर मासिक जनही १५ हजार रुपैयाँ प्रदान हुदैं आएकोमा यसबर्ष नगर परिषद्बाट प्राप्त हुने बजेट शंसोधन नभए तीनै तहमा कार्यरत जनशक्तिको तलब घट्ने देखिएको छ ।
शिक्षा अधिकृत पौडेलका अनुसार नगर परिषद्ले बाल शिक्षक,कार्यालय सहयोगी र विद्यालय कर्मचारीका लागि भनेर आगामी आवमा ४१ लाख ८६ हजार रुपैयाँ बिनियोजन गरेको छ ।
‘परिषद्बाट अनुमोदन भएपनि रातो किताबमा छाप्ने प्रयोजनका लागि प्रमाणीकरण भइसकेको भने छैन’ शिक्षा अधिकृत पौडेलले भने । उनका अनुसार आगामी आवमा बाल शिक्षक,कार्यालय सहयोगी र विद्यालय कर्मचारीका लागि बिनियोजन भएको सो रकममध्ये बाल शिक्षकका लागि संघ सरकारबाट प्राप्त हुने अनुदानमा मासिक जनही ४ हजार,कार्यालय सहयोगीका लागि मासिक जनही २ हजार र विद्यालय कर्मचारीका लागि मासिक जनही १ हजार थप गर्ने गरी बजेटको बाँडफाँडको आधार बनाइएको छ । यसोगर्दा बाल शिक्षकले मासिक अब १२ हजार,विद्यालय कर्मचारीले १४ हजार ५ सय र कार्यालय सहयोगीले १० हजार रुपैयाँ जनही मासिक तलब प्राप्त गर्नेछन् ।
संघीय सरकारले आगामी आवको बजेटबाट लागु हुने गरी बाल शिक्षकको मासिक जनही २ हजार रुपैयाँ वृद्धि गर्ने भनेको छ । नगर परिषद्को अहिलेको निर्णय शंसोधन नभए र केन्द्र सरकारले वृद्धि गरेको रकम पठाएको अवस्थामा फुङलिङ नगरपालिकामा कार्यरत बाल शिक्षकले अब मासिक १४ हजार रुपैयाँ प्राप्त गर्नेछन् । चालू आर्थिक वर्ष सम्मको अवस्था हेर्दा संघ सरकारले वृद्धि गरेको मासिक २ हजार सहित बाल शिक्षकले मासिक १७ हजार रुपैयाँ पाउनुपर्ने अवस्था रहन्थ्यो । नागरिक दैनिकबाट
प्रकाशित मिति: बुधबार, असार २२, २०७९ ११:१३
