काठमाडौं- प्रमुख प्रतिपक्षी दल नेकपा एमालेका अध्यक्ष केपी शर्मा ओलीले नेपालका वामपन्थीहरुबीच एकतामा जोड दिएका छन् । नेपाल–चीन हिमालयमैत्री समाजले शनिबार राजधानीमा आयोजना गरेको ‘नेपालको भूराजनीतिक अवस्था: चुनौती र अबको बाटो’ विषयक कार्यक्रममा उनले नेपालका कम्युनिस्ट पार्टीहरूलाई वामपन्थी एकतामा आउनसमेत आग्रह गरे ।
‘कांग्रेसको पछि लाग्ने वामपन्थी हुँदैन, कोही वामपन्थी हुनुहुन्छ भने गठबन्धन छाड्नुहोस्, वाम एकता गरौँ,’ उनले भने । पूर्वप्रधानमन्त्रीसमेत रहेका ओलीले देश, राष्ट्रियता, लोकतन्त्र, स्वाधीनताका लागि वामपन्थी मिल्नुपर्ने बताए । मुलुकको आधारभूत मूल्य मान्यता राष्ट्रियता, प्रजातन्त्र, लोकतन्त्र, सुशासन र मुलुकको विकासका लागि सबै दल मिल्नुपर्ने उनको भनाइ छ ।
अध्यक्ष ओलीले चीन र भारतसँग नेपालले सुमुधुर सम्बन्ध राख्नुपर्नेमा जोड दिए । उनले आफ्नो मनमा नेपालसँगै मुलुकको स्वाभिमान, स्वतन्त्रता र नेपाली जनताको उन्नति प्रगतिबाहेक अरू केही नभएको प्रष्टीकरण दिए ।नेकपा माओवादी केन्द्रका नेता नारायणकाजी श्रेष्ठले वामपन्थी शक्ति एकता भए मात्र मुलुकको स्वाधीनताको रक्षा हुने बताए । वाम एकताका लागि सबैले पहल लिनुपर्ने उनको भनाइ थियो । उनले पार्टी एकता तत्काल नभए पनि मोर्चा वा गठबन्धन गर्नुपर्नेमा जोड दिए ।
‘हामी वामपन्थी दल एकले अर्कालाई सिध्याउने नाममा आफैं सिद्धिँदै छौँ,’ उनले भने, ‘वामपन्थी आन्दोलन सकियो भने मुलुक कमजोर हुन्छ ।’ नेता श्रेष्ठले मुलुकको असंलग्न परराष्ट्र नीति, कूटनीतिक मामिलामा सबै दलको एक नीति हुनुपर्नेमा जोड दिए। ‘परराष्ट्र नीतिमा दलबीच सहमति कायम गर्न सक्यो भने कसैले पनि कमजोर पार्न सक्दैन,’ उनले भने ।
जनता समाजवादी पार्टीका अध्यक्ष उपेन्द्र यादवले भूराजनीतिक अवस्थाले नेपालको उपस्थिति कमजोर हुँदै गएको बताउँदै परराष्ट्र नीतिमा सबै दल एक मत हुनुपर्ने बताए । नेपाली कांग्रेसका नेता चन्द्र भण्डारीले सबै दल मिलेर परराष्ट्र नीति साझा बनाउनुपर्ने बताए । राष्ट्रिय प्रजातन्त्र पार्टीका अध्यक्ष राजेन्द्र लिङदेनले छिमेकीसँगको सम्बन्ध पहिलेजस्तै हुनुपर्ने भन्दै परराष्ट्र नीतिमा सबै दल एक हुनुपर्ने बताए ।
कार्यक्रममा डा. दिनेश पौडेलले कार्यपत्र प्रस्तुत गरेका थिए । उनले नेपालको भूराजनीतिक हिसाबले चुनौती र अवसर दुवै रहेको बताए । कार्यपत्रमाथि टिप्पणी गर्दै पूर्वमन्त्री आनन्द पोखरेल र प्राध्यापक खड्ग केसीले नेपालका राजनीतिक दलबीच परराष्ट्र नीतिका सम्बन्धमा एउटै बोली हुनुपर्नेमा जोड दिए । उनीहरूले चीन र भारतसँग रणनीतिक सन्तुलन राख्न आग्रह गरे ।
प्रकाशित मिति: आइतबार, साउन १, २०७९ ०९:१८
