काठमाडाैं - नेपाल राष्ट्र बैंकका गर्भनर महाप्रसाद अधिकारीलाई पदबाट राजिनामा दिन सांसदहरुले सुझाव दिएका छन् ।
प्रतिनिधिसभाको आजको बैठकमा सांसदहरुले गर्भनर अधिकारीलाई पदबाट राजिनामा दिएर कानून र नैतिकता देखाउन सुझाब दिएका हुन् ।
कानून र नैतिकताको प्रश्न उठ्ने बित्तिकै राजिनामा दिनुपर्ने भन्दै सांसदहरुले गर्भनरको बिषयलाई लिएर सडक आन्दोलन भै रहेको भन्दै सरकारको ध्यानाकर्षण गराएका थिए ।
सांसदहरुले विशेषगरी वर्षातसँगै तराई क्षेत्रमा वढ्दो डुवान र पहाडी क्षेत्रमा पहिरोका कारण जनधनको क्षति भएको भन्दै क्षति न्युनीकरण गर्न सरकारको ध्यानाकर्षण गराएका छन् । साथै वाढी पहिरोमा परेर जनधन गुमाएका नागरिकहरुलाई उचित राहतको ब्यवस्था दिन पनि माग गरेका छन् ।
यस्तै सांसदहरुले कृषकहरुले अहिले पनि मल पाउन नसकेको बताउँदै संसदमा उठाइएका विषयहरु सम्बोधन नभएको भन्दै सभामुखको ध्यानाकर्षण समेत गराएका थिए ।
सांसदहरुले सामान्य नागरिकले सहज रुपमा न्याय पाउन कठिन भएको र न्यायालयमा हुने गरेका भ्रष्टाचारका विषय बाहिरिने गरेकाले न्यायालयको समग्र सुधारमा ध्यान दिन सरकारको ध्यानाकर्षणसमेत गराएका थिए ।
समग्र न्यायालयको सुधारका लागि उच्चस्तरीय न्याय सुधार र निर्देशन आयोग गठन हुनुपर्नेमा पनि सांसदहरुको जोड थियो । साथै शुन्य समयमा बोल्ने अन्य सांसदहरुले समसामयिक विषय र आ–आफ्नो क्षेत्रमा देखा परेका समस्या समाधानका लागि सरकारको ध्यानाकर्षण समेत गराएका थिए ।
प्रकाशित मिति: बुधबार, साउन ४, २०७९ १९:४१
