काठमाडौं — सहिद स्मारक ‘ए’ डिभिजन लिग फुटबलमा नेपाली सेनाको त्रिभुवन आर्मी क्लब र संकटा क्लब विजयी भएका छन् । बिहीबार त्रिपुरेश्वरस्थित दशरथ रंगशालामा सम्पन्न दुवै खेल मध्ये पहिलो खेलमा सशस्त्र प्रहरीको विभागीय टिमलाई ४–२ ले र दोस्रो खेलमा सरस्वती युथक्लबलाई १–० ले पराजित गर्दै त्रिभुवन आर्मी क्लबले जित हात पारेका हुन् । यसजितसँगै आर्मी क्लब लिगको शीर्षस्थानमा समेत उक्लिएको छ ।
आर्मीको झिनो जितमा जर्ज प्रिन्स कार्कीले निर्णायक गोल गरे । खेलको ३० औं मिनेटमा दिनेश हेन्जनको पासमा जर्ज प्रिन्सले गोल गरेका थिए ।
सरस्वतीविरुद्ध एकतर्फी खेल पस्किएको आर्मीले थुप्रै गोलको अवसर खेर फालेको थियो । खेलको तेस्रो मिनेटमै दिनेश हेम्जनले डिबक्स भित्रबाट क्रसबार माथी प्रहार गरे । यस्तै पहिलो हाफको इन्जुरी समयमा जर्ज प्रिन्स गोल गर्न चुके । एकल प्रयासमा गोलकिपर बिट गरेपनि उनले पोस्ट बाहिर प्रहार गरे । उनले प्रहार गरेको बल दोस्रो बारको केही इन्च परबाट गएको थियो । दोस्रो हाफमा पनि आर्मीले केहि अवसर खेर फाल्यो । ५१ औं मिनेट जर्ज प्रिन्स सरस्वतीका गोलकिपरसँग वान भर्सेस वानमा गोल गर्न चुके ।
सरस्वतीले पनि केहि अवसर खेर फालेको थियो । २४ औं मिनेटमा सरस्वतीका अबेल एमवान्किनाको प्रहार आर्मीका किपर विकेश कुथुले सहजै बचाए । यस्तै ५४ औं मिनेटमा सरस्वतीका विनोद केसीको डिबक्स भित्रको कडा प्रहार पनि विकेशले विफल बनाईदिए । खेलमा आर्मीका विकास खवास म्यान अफ दि म्याच चुनिए ।
आर्मीको यो लिगमा चौंथो जित हो । जितसँगै शीर्ष स्थानमा उक्लिएको आर्मीले ५ खेलमा १२ अंक जोडेको छ । सरस्वतीको यो लगातार पाँचौं हार हो । लिगको पुछारमा रहेको सरस्वतीले ५ खेलमा अंक जोड्न सकेको छैन ।
त्यसअघि बिहीबार नै सम्पन्न पहिलो खेलमा विभागीय टोली एपीएफमाथि जित निकाल्ने क्रममा संकटाका अजयी मार्टिन्सले दुई गोल गरे । यस्तै लक्ष्मण रुचाल र कर्ण लिम्बुले एक एक गोल गरे । एपीएफका नबिन लामा र आशिष लामा लामाले एक एक गोल फर्काए ।
खेलमा सुरुवाती अग्रता पनि संकटाले बनाएको थियो । खेलको १९ औं मिनेटमा लक्ष्मणले फ्रिकिकमा गोल गर्दै संकटालाई अग्रता दिलाएका थिए । त्यसपछि खेलको ४४ औं मिनेटमा कर्णले गोल गर्दा पहिलो हाफमा संकटा २–० ले अघि रह्यो । कर्णको यो संकटाको लागि पहिलो गोल समेत हो ।
५३ औं मिनेटमा मार्टिन्सले गोल गर्दै संकटालाई ३–० को अग्रता दिलाए । तर, ५६ औं मिनेटमा एपीएफका नविनले पेनाल्टीमा गोल गर्दै खेल ३–१ को बनाए । त्यसपछि खेलको ७२ औं मिनेटमा एपीएफका आशिषले गोल गर्दै खेल ३–२ को स्थितिमा ल्याए ।
तर, खेलको ८८ औं मिनेटमा मार्टिन्सले व्यक्तिगत दोस्रो गोल गर्दै संकटालाई ४–२ को जित दिलाए । खेलमा मार्टिन्स नै म्यान अफ दि म्याच चुनिए ।
जितसँगै संकटा लिगको सातौं स्थानमा उक्लिएको छ । संकटाले ५ खेलमा ७ अंक जोडेको छ । एपीएफको ५ खेलमा ४ अंक रहेको छ । एपीएफ लिगको ११ औं स्थानमा रहेको छ ।
