काठमाडौं– निनाम हाङ राई र वविन किरातीको स्वरमा रहेको गीत ‘मैना मैनी’ सार्वजनिक गरिएको छ । शुक्रबार राजधानीको सरस्वतीनगरस्थित फलैंचामा एक कार्यक्रमबीच गीतकार संघका उपाध्यक्ष शुभ मुकारुङको आतिथ्यतामा पर्यटन प्रवद्र्धनसम्बन्धी गीत सार्वजनिक गरिएको हो ।
दीलिप राई ‘सागर’को शब्द, सन्तोष दुमीको संगीत, दिवेश राईको एरेञ्ज रहेको गीतको भिडियोलाई आशिक राईले निर्देशन गरेका छन् । उदयपुरको बेलका नगरपलिकाको मैना मैनीको प्राकृतिक सौन्दर्यको वर्णन गरिएको गीतको भिडियोमा नग्मा श्रेष्ठ, निनामहाङ राई, सरिता राई, मनिषा राईलगायतलाई फिचरिङ गरिएको छ । सुरज खनालले छायाङ्कन गरेको भिडियोमा विकास धमलाको सम्पादन रहेको छ ।
कार्यक्रममा गीतकार मुकारुङले गीत राम्रो रहेको र गीतको भिडियो उत्कृष्ट रहेको बताए । पर्यटन वर्ष–२०२० लाई लक्षित गरिएको उक्त गीतको भिडियोमा प्राकृतिक सुन्दरताले भरिपूर्ण मैना मैनी घुम्नका लागि गीतमार्फत आग्रह गरिएको गायक निनामले बताए ।
