इटहरी — मनमोहन मेमोरियल (एमएम) कप एकदिवसीय राष्ट्रिय क्रिकेट प्रतियोगिताको सोमबार इटहरीमा सम्पन्न खेलमा मलेसिया–११ ले गण्डकी प्रदेशलाई पराजित गर्दै सान्त्वना जित हात पारेको छ । लिग चरणको अन्तिम खेलमा मलेसियाले गण्डकी प्रदेशलाई १ सय ९२ रनले पराजित गरेको हो ।
मलेसिया पहिले ब्याटिङ गर्दै दिएको २ सय ९९ रनको लक्ष्य पछ्याउने क्रममा गण्डकीले २७ ओभर २ बलमा १ सय ६ रन बनाउँदा अलआउट भएको थियो । उसका बिपिन खत्रीले ४२ रनको सर्वाधिक इनिङ्स खेले ।
यस्तै प्रविन ढकालले १९ र बिधान श्रेष्ठले १० रन बनाउनु बाहेक अन्य खेलाडीले दोरोहो अंक छुन सकेनन् । मलेसियाका सुहार्रिल फेट्रिले ४ तथा अनवर रहमन र विजय उन्नीले समान ३÷३ विकेट हात पारे । यसअघि टस जितेर पहिले ब्याटिङ गरेको मलेसियाले निर्धा्रित ४७ ओभरमा ८ विकेट गुमाएर २ सय ९८ रन बनाएको थियो । मलेसियाको उच्च स्कोरमा ३ खेलाडीले अर्धशतक बनाए ।
ऐनोल हकिमले सर्वाधिक ८९ रन बनाउँदा भुसन सेभ र भिरनदिप सिंहले समान ५०÷५० रन बनाए । यस्तै कप्तान अहमेद फाइजले ३१, मोहमद अरिफले २० रनको योगदान गरे ।
गण्डकीका बिपिन खत्रीले ३ विकेट लिए । यस्तै चन्द्र पौडेलले २ र गोविन्द प्रधानले १ विकेट हात पारे । जितसँगै मलेसियाले समूह ’डी’ बाट २ खेलमा २ अंक जोड्यो । गण्डकीले २ खेलमा अंक जोड्न सकेन । यस समूहबाट सुदुरपश्चिम प्रदेशले २ खेलमा २ जित निकाल्दै सेमिफाइनलमा स्थान बनाईसकेको छ । अब सेमिफाइनलमा त्रिभुवन आर्मीले प्रदेश ३ तथा नेपाल पुलिस क्लबले सुदुर पश्चिम प्रदेशको सामना गर्नेछ ।
प्रकाशित मिति: मंगलबार, पुस २९, २०७६ ०७:५०
