काठमाडौं — सहिद स्मारक ‘ए’ डिभिजन लिग फुटबलको सोमबार भएको खेलमा बलियो मानिएको विभागीय टिम नेपाल पुलिस क्लब न्यूरोड टिम एनआरटीबाट पराजित भएको छ । त्रिपुरेश्वरस्थित दशरथ रंगशालामा सम्पन्न खेलमा दर्शन गुरुङको निर्णायक गोलसँगै १–० ले एनआरटीले पुलिसविरुद्ध ३ महत्वपूर्ण अंक जोड्न सफल भयो । त्यस्तै दोस्रो खेलमा विभागीय टोली सशस्त्र प्रहरीको एपीएफले च्यासल युथ क्लबले गोलरहित बराबरी खेल्दै अंक बाँडेको छ ।
एपीएफविरुद्ध बल पोजिसनमा एकतर्फी पटक बनाएको च्यासलले पाएको अवसर गुमाउँदा एक अंकमा चित्त बुझाएको हो । एपीएफले केहि गोलको अवसर खरे फालेको थियो । खेलको १६ औं मिनेटमा नबिन लामाको कर्नरमा आएको बलमा एपीएफका राजन गुरुङको उत्कृष्ट हेड च्यासलका गोलरक्षक एलेन न्यौपानेले पन्च गर्दै गोल हुनबाट बचाए ।
खेलको २० औं २० मिनेटमा च्यासलले गोलको सुनौलो अवसर गुमायो । सुनिल खड्काले एक डिफेन्डरलाई बिट गरेपनि वान भर्सेस वानको स्थितिमा गोल गर्न सकेनन् । डिबक्स भित्रबाट हानेको उनको प्रहार एपीएफका गोलरक्षक अमृत कुमार चौधरीले बचाए ।
लगत्तै २५ औं मिनेटमा च्यासलका अमिर श्रेष्ठले डिबक्स भित्रबाट हानेको सशक्त प्रहार एपीएफका गोलरक्षक अमृतले पन्च गर्दै बाहिर पठाए । खेलको ३८ औं मिनेटमा एपिएफका रबि थिङको प्रहार च्यासलका गोलरक्षक एलेनले बचाए । यस्तै ५४ मिनेटमा युवराज खड्काको क्रसमा राजिब लोप्चनको हेड पनि एलेनले पन्च गर्दै गोल हुनबाट जोगाएका थिए । एपीएफसँगको बराबरीसँगै च्यासलले अंक तालिका सुधारको अवसर गुमाएको छ । ६ खेलमा ६ अंक जोडेको च्यासल लिगको दशौँ स्थानमा रहेको छ । यस्तै एपीएफ ६ खेलमा ५ अंक जोडेर ११ औं स्थानमा रहेको छ । त्यसअघि एनआरटी र पुलिसबीचको खेलको पहिलो हाफ गोलरहित बराबरीमा सकिएको खेलको ७६ औं मिनेटमा दर्शनले निर्णायक गोल गरे । डिबक्स भित्रबाट उनको प्रहार गोलमा परिणत भएको थियो । एनआरटीविरुद्ध बल पोजिसनमा पकड जमाएपनि पुलिसले गोल गर्न सकेन ।
खेलको ३७ औं मिनेटमा डिबक्स भित्रबाट पुलिसका सुमन लामाको कडा प्रहार एनआरटीका गोलरक्षक अजित प्रजापतिले पन्च गर्दै गोलको खडेरी टारेका थिए । त्यसअघि खेलको २५ औं मिनेटमा पुलिसका लेङ्खट ब्याक रबिन श्रेष्ठ चोटका कारण मैदानबाट बाहिरिएका थिए । उनको स्थानमा अन्जन राई मैदान छिरेका थिए ।
खेलको ४८ औं मिनेटमा पुलिसका मान बहादुर परियारको हेड बल एनआरटीका मिडफिल्डर एरिक बिष्टले गोललाइनबाट क्लिएर गरेका थिए । यस्तै खेलको अतिरिक्त समयमा पुलिसका अन्जन राईले डिबक्स बाहिरबाट हानेको लामो प्रहार क्रसबारमा लागेर फर्किदा पुलिस बराबरी गर्न चुक्यो ।
एनआरटीले पनि केहि अवसर खेर फालेको थियो । खेलको ७८ औं मिनेटमा राजेश परियारले डिबक्स भित्रबाट हानेको कडा प्रहार पुलिस गोलरक्षक शत्रुधन चौधरीले बचाउ गरे । जितसँगै एनआरटी लिगको छैटौं स्थानमा उक्लिएको छ । लिगमा एनआरटीको यो तेस्रो जित हो । एनआरटीले ६ खेलमा ८ अंक जोडेको छ । पुलिसको यो दोस्रो हार हो । पुलिस ६ खेलमा ८ अंकसहित सातौं स्थानमा झरेको छ ।
