काठमाडौं– चर्चित गायक तथा संगीतकार निशान भट्टराईको सवारी दुर्घटनामा निधन भएको छ । सोमबार राति काठमाडौंको दरबारमार्गस्थित एक रेस्टुरेन्टबाट फर्किने क्रममा गायक भट्टराई दुर्घटनामा परेका थिए ।
‘पिएर नशा अधरको तिम्रो छैन अझै भरिएको दिल’जस्ता चर्चित गीतका गायक आफैले चलाएको कार अन्यन्त्रित भइ दु्र्घटना भएको प्रहरीले जनाएको छ । दुर्घटनामा सख्त घाइते उनको वीर अस्पतालको ट्रमा सेन्टरमा उपचारकै क्रममा निधन भएको थियो । गायक भट्टराई दरबारमार्गमा रहेको ‘वान थाई रेस्टुरेन्ट’मा नियमित गायन प्रस्तुति दिँदै आएका थिए ।
ट्राफिक प्रहरी प्रमुख एसएसपी भीमप्रसाद ढकालका अनुसार भट्टराईको कार तीनकुनेमा पोलमा ठोकिएर दुर्घटनामा भएको थयो । गायक भट्टराईको ‘कामनाले भरिएको’ पहिलो गीत हो ।
दीर्घ सिंह बमको रचनामा उनले पहिलो गीत रेडियो नेपालमा गाएका थिए । ‘माया गर माया गर.’ उनको अर्को लोकप्रिय गीत हो । उनका ‘पिएर नशा अधरको तिम्रो छैन अझै भरिएको दिल’लगायत ‘हेर धर्ती’ जस्ता दर्जनौँ चर्चित गीत छन् । उनी नयाँ पुस्ता माझ समेत लोकप्रिय थिए । दिवंगत गायक भट्टराईको मंगलबार नै अन्त्येष्टि गरिएको छ ।
