काठमाडौं- विश्वकप फुटबल प्रतियोगिताका लागि कतारमा निर्माण गरिएका रंगशालामा काम गर्दा घाइते तथा मृत्यु भएका श्रमिकका परिवारलाई क्षतिपूर्ति दिन बेलायती फुटबल संघ (एफए)ले आग्रह गरेको छ ।
अन्तर्राष्ट्रिय समाचार संस्था रोयटर्सका अनुसार एफएका प्रमुख कार्यकारी मार्क बुलिङ्घमले रंगशाला निर्माणका क्रममा घाइते तथा मृत्यु भएका आप्रवासी श्रमिक र तिनका परिवारलाई क्षतिपूर्ति प्रदान गर्न आग्रह गरेका हुन् ।
रंगशाला निर्माणका क्रममा के–कति आप्रवासी श्रमिकहरु घाइते तथा मृत्यु भए भन्ने विवरण सार्वजनिक नभए पनि उनीहरुलाई क्षतिपूर्ति नदिएको र थुप्रै विदेशी श्रमिकको शोषण गरेको भन्दै अन्तर्राष्ट्रिय मानवअधिकारवादी संस्थाहरुले आलोचना गर्दै आएका छन् ।
एम्नेस्टी इन्टरनेसनल, ह्युमन राइट्स वाच तथा फेयर स्क्वायरले संयुक्तरुपमा फिफाका साझेदार तथा विश्वकप फुटबल प्रतियोगिताका प्रायोजकहरुलाई रंगशाला निर्माणका क्रममा घाइते वा मृत्यु भएका विदेशी श्रमिकका परिवारलाई क्षतिपूर्ति प्रदान गर्न आह्वान गरेको रोयटर्सले जनाएको छ ।
गत मे महिनामा उनीहरुले फिफालाई सम्बोधन गर्दै लेखेको पत्रमा कतारले करोडौं रकम विदेशी श्रमिक र तिनका परिवारलाई भुक्तानी नगरेको उल्लेख गरेका थिए । घाइते तथा मृत्यु भएका आप्रवासी कामदार र तिनका परिवारलाई क्षतिपूर्ति प्रदान गरिनुपर्छ भन्दै आवाज उठाएर फिफासँग पनि यसबारे जानकारी मागिएको एफएका कार्यकारीको भनाइ छ ।
कतार सरकारले आफ्नो श्रम कानुन तथा श्रम प्रशासनमा निरन्तर सुधार गरेको र आप्रवासी श्रमिकको अधिकारका लागि काम गरिएको जनाएको छ । तर, एम्नेस्टी इन्टरनेसनलको सन् २०२१ को रिपोर्टलाई भने यसलाई अस्वीकार गरेको छ ।
प्रकाशित मिति: शुक्रबार, असोज १४, २०७९ १४:१९
