काठमाडौं - इन्टरनेट सेवा प्रदायक वर्ल्डलिङ्कले देशभरका आफ्ना १०६ कर्मचारीलाई निःशुल्क विद्युतीय चुलो उपलब्ध गराउने भएको छ ।
कम्पनीले व्यवसायिक सामाजिक उत्तरदायित्व अन्तर्गत विद्युतीय चुलो (इन्फ्रारेड कुकटप) वितरण गर्ने भएको हो ।
वर्ल्ड लिङ्कका निर्देशक मनोज अग्रवालले देशका विभिन्न ठाउँमा विद्युत पुगिसकेकाले विद्युतीय चुलो वितरण गर्न लागेको बताएका छन् ।
''कर्मचारीको पृष्ठभूमि हेरेर कर्मचारी छनौट गरिएको छ,'' उनले भने, ''हाम्रा आन्तरिक कर्मचारी पनि देशका विभिन्न ठाउँबाट छन् ।त्यसैले हामीले यसको सुरुवात कम्पनीबाट नै गरेका हौँ ।''
कम्पनीले विभिन्न कर्मचारीलाई यसभन्दा अघि विद्युतीय चुलोका लागि आवेदन दिन लगाएको थियो । सोही आवेदनका आधारमा छनौटमा परेका १०६ कर्मचारीलाई विद्युतीय चुलो वितरण गर्न लागेको अग्रवालले बताएका हुन् ।
सामाजिक उत्तरदायित्व अन्तर्गत कम्पनीले उपलब्ध गराउने इन्फ्रारेड चुलोले स्वच्छ ऊर्जाको प्रवर्द्धनमा प्रत्यक्ष रूपमा योगदान पुर्याउने कम्पनीको विश्वास छ ।
दिगो विकासका विभिन्न सात लक्ष्यलाई प्रवर्द्धन गर्ने उद्देश्यले विद्युतीय चुलो वितरण गर्ने तयारी गरिएको उल्लेख छ ।
प्रकाशित मिति: सोमबार, कात्तिक ७, २०७९ ११:०४
