काठमाडौं– कतार फिफा विश्वकपअन्तर्गत आज मंगलबार चार खेल आयोजना हुँदैछन् । पहिलो खेलमा अर्जेन्टिना र साउदी अरेबियाबीच प्रतिस्पर्धा हुनेछ । खेल नेपाली समय अनुसार दिउँसो पौने चार बजे सुरु हुनेछ ।
स्टार खेलाडी लियोनल मेसीको कप्तानीमा अर्जेन्टिना सुखद् सुरुवात गर्ने तयारीमा छ । मेसीले यो प्रतियोगितामा नै आफ्नो अन्तिम विश्वकप भएको बताएका छन् । अर्जेन्टिनालाई मेसीसहित, लौटारो मार्टिनेज, डि मारिया, पाउलो डिबला जस्ता खेलाडीको साथ छ ।
साँझ पौने सात बजे हुने खेलमा डेनमार्क र ट्युनिसिया खेल्नेछन् । यसैगरी राति पौने दश बजे मेक्सिको र पोल्यान्डबीच भिडन्त हुनेछ । पौने एक बजे फ्रान्स र अस्ट्रेलियाबीच प्रतिस्पर्धा हुने तालिका छ ।
समूह ‘सी’ को अर्जेन्टिना र साउदीसँगै मेक्सिको र पोल्यान्ड छन् । चारै देशको कतार विश्वकपमा पहिलो खेल हो । यता, समूह डी मा समेत फ्रान्स र अस्ट्रेलिया तथा डेनमार्क र ट्युनिसियाको पहिलो खेल रहेको छ ।
प्रकाशित मिति: मंगलबार, मंसिर ६, २०७९ १०:३९
