काठमाडाैं - काठमाडाैंसहित देशभर लगातार चिसो बढिरहेको छ । दिउँसो खासै चिसो नभए पनि बिहान र बेलुका चिसो बढ्दै गएको छ । काठमाडाैंकाे न्यूनतम तापक्रम सात डिग्री सेल्सियसमा झरेको छ ।
बिहानको समयमा देशका धेरै ठाउँमा हुस्सु कुहिरोसमेत लाग्न थालेको छ ।न्यूनतम तापक्रम घट्नु र हुस्सु कुहिरो लाग्नुले बिहान चिसो हुने गरेको छ । यस्तै, बेलुका भने चिसो हावा चल्ने गरेको छ ।
अहिले पनि काठमाण्डौसहित तराईका जिल्लामा हुस्सु कुहिरो लागेको छ । तर बिस्तारै कुहिरो हटेर घाम लाग्ने मौसमविद् हिरा भट्टराईले जानकारी दिए ।
उनका अनुसार आज प्रदेश-१ र गण्डकी प्रदेशका पहाडी क्षेत्रको मौसम आंशिक बदली हुने सम्भावना छ । अन्य ठाउँको मौसम भने सामान्यतया सफा नै रहने मौसमविद् भट्टराईले बताए ।
प्रकाशित मिति: आइतबार, मंसिर १८, २०७९ ०९:२६
