काठमाडौं– पछिल्लो समय भारतीय गायिका नेहा कक्कड र आदित्य नारायण चर्चामा छन् । उनीहरूलाई बिहेको खबरले चर्चामा ल्याएको हो ।
आदित्य र नेहाको परिवारले जब यी जोडीको बिहेको कुरा बाहिर ल्याए, तब उनीहरू मिडियामा छाए । ‘इन्डियन आइडल’मा जर्जका रूपमा आएकी नेहा र उद्घोषक आदित्यको बिहे हुने कुरा कार्यक्रमको मञ्चमै सार्वजनिक गरिएको थियो ।
कार्यक्रममा उपस्थित नेहा र आदित्यका परिवारले दुई जनाको बिहे यही १४ फेब्रुअरीमा गर्ने समेत बताएका छन् । त्यसपछि यी दुई कलाकारले चर्चा पाइरहेका छन् । यस्तै, आदित्यका बुवा गायक उदित नारायण झाले समेत बिहेको हल्लालाई पुष्टि गरेका छन् । उदितले भारतीय एक दैनिक पत्रिकालाई दिएको अन्तर्वार्तामा भनेका छन, ‘मेरो घरमा बुहारीका रूपमा कोही महिला गायक आउँदैछिन् ।’ उनले नेहा मायालु केटी भएको समेत बताए छन् । ‘धेरै राम्रो गाउँछिन् पनि, मलाई नेहा मनपर्छ’ उदितले भनेका छन्, ‘म मात्रै होइन, उनलाई मनपराउने लाखौँ छन् । म उनका गीत प्रायः सुन्ने गरेको छु ।’
उदितले यो पनि भने कि ‘मलाई आदित्य र नेहाबारे धेरै जानकारी छैन तर, उनीहरू सम्बन्धमा रहेको कुरा भने केही थाहा छ ।’ उनले हल्ला भएजस्तै साँच्चै दुवै जनाले बिहे गरे भने खुसी हुने उदितले बताएका छन् ।
