काठमाडौं–सरकारले मनोरञ्जनात्मक क्षेत्रको सञ्चालन समय थप गरेको छ । दोहोरी साँझहरुलाई राति १२ बजेसम्म र डान्स बारहरुलाई बिहान ४ बजेसम्म सञ्चालन गर्न दिने निर्णय सरकारको छ । राति अबेलासम्म यी क्षेत्र खोल्न दिँदा व्यवसायीहरुलाई फाइदा भयो । तर, अन्य सर्वसाधारण मर्कामा परेका छन् । रातिभरि मदिरा पिएर बबाल मच्चाउने, कुटाकुट गर्ने, आफूसँग भएको पैसा सिध्याउने, अरुलाई डिस्टर्ब गर्ने, होहल्ला गर्नेलगायतका कार्य अब बढ्ने देखिन्छ ।
यसले थप बेथिति मच्चिने निश्चित छ । सुरक्षामासमेत चुनौती आउने देखिन्छ । पहिले दोहोरी साँझ राति ९ बजेसम्म मात्र सञ्चालन गर्न पाइन्थ्यो । यता, डान्स बारहरु राति १२ बजेपछि सञ्चालन गर्न प्रतिबन्ध लगाइएको थियो । सुरक्षामा खतरा हुने देख्दादेख्दा पनि जिल्ला प्रशासन कार्यालय काठमाडौंले किन समय थप ग¥यो ? यसले विभिन्न आपराधिक र गैरकानुनी क्रियाकलाप निम्त्याउने जान्दाजान्दै पनि प्रजिअ घनश्याम उपाध्यायले व्यवसायीको पक्षमा निर्णय गरिदिए ।
यो निर्णय गर्नका लागि व्यवसायीहरुले मोटो खर्च गरेको देखिन्छ । यसले समाजलाई कति असर पर्छ ? समाज, टोलमा कति विकृति फैलिन्छ भन्ने ख्याल गरिएन । जति पनि दोहोरी साँझ, डान्स बारहरु छन्, ती सबै घनाबस्तीको बीचमा छन् । यी क्षेत्र रातभर खोल्न दिँदा छरछिमेकलाई त डिस्टर्ब हुने भो । दिनभरि थाकेर आएकालाई डान्स बार र दोहारी साँझको आवाजले कति सताउँला ? सरकारको निर्णयले जनतालाई सुत्न र आराम गर्नबाट पनि वञ्चित गरेको छ ।
रातभर दोहोरी साँझ, रेस्टुरेण्ट र डान्स बार खोल्दाको असर घरपरिवारमा अवश्य देखिन्छ । राति छोराछोरी, बाबुआमा अबेला आउँदा घरपरिवारलाई चिन्ता हुन्छ । श्रीमती घरमा कुरेर बस्छिन्, श्रीमान् मदिरापानमा रमाइरहेका हुन्छन् । छोराछोरी रातभर बाहिर बस्दा बाबुआमालाई कति तनाव हुन्छ ? सरकारले घरपरिवार बिगार्ने काम गरिरहेको छ । राति जाँड खाएर गाडी चलाउँदा सवारी दुर्घटनामा पर्न सक्छ । सरकारले कतितिर सुरक्षा दिने ? रातभरि यी क्षेत्र खोल्न दिँदा फाइदा होइन बेफाइदा छ ।
राति ९ बजेपछि हरेक व्यवसाय बन्द गर्न लगाउनुपर्छ । व्यवसाय गर्ने नाममा घर, समाज बिगार्नु ठीक होइन । तर, सरकारले त्यसको दोस्रो पाटो हेरेन । व्यवसायीले कर तिरेका छन् भन्दैमा समाज बिगार्ने काम गर्न त पाइँदैन नि । सरकारको यो निर्णयको विरोधमा हाल सर्वसाधारणले आवाज उठाउन थालिसकेका छन् । डान्स बार, दोहोरी साँझलगायतका मनोरञ्जनात्मक क्षेत्रलाई उपत्यकाबाहिर सार्नुपर्ने माग उठेको छ । दिनभरि काम गरेर थाकेको ज्यान, त्यहीमाथि आराम गर्न नपाउँदा कति रिस उठ्छ ?
जनतालाई दुःख दिएर व्यवसायीहरु कमाउने अनि राज्यले कर उठाउने, यो त मिलेन । मनोरञ्जन दिने भनेर उपत्यकाभित्र सञ्चालन भएका यस्ता व्यवसायलाई हटाउन वा बन्द गर्न जनताहरुले नै आवाज उठाउने देखिन्छ । कि यसलाई सार्नुप¥यो, कि बन्द गर्नुप¥यो भनेर माग उठ्न थालेको छ ।
डान्स बार, दोहोरी साँझमा काम गर्ने अधिकांशको घर व्यवहार बिग्रिएको छ । आफ्नो त बिग्रियो बिग्रियो, अरुको पनि बिगार्छन् । जनताको घरमा झगडा बनाइदिने, तनाव दिनेलगायतका कार्य सरकारबाटै भइरहेको छ । होटल व्यवसायीलाई फेरि यसले भव्य फाइदा हुन्छ । दिउँसो १०० रुपैयाँ पर्ने सामान राति एक हजार रुपैयाँमा बेच्न पाइयो । तर, त्यहाँ कार्यरत कर्मचारी र ग्राहकको घर व्यवहार तहसनहस भएको छ । राज्यले यस्ता क्षेत्रलाई दिउँसै सञ्चालन गर्न दिनुपर्छ ।
सरकारको यो निर्णय व्यावहारिक छैन । त्यसैले यी व्यवसाय रातको समयमा बन्द गर्नुपर्छ । राज्यले जनताको विषयमा ख्याल नगरी व्यवसायीको पक्षमा निर्णय ग¥यो । व्यवसायीको हितमा राज्यले काम गरिरहेको छ । यो निर्णयले जनतालाई कति क्षति पुगेको छ ? दुर्घटना कति हुन्छ ? लगायतका विषयमा कुनै पनि अध्ययन गरिएको छैन ।
प्रकाशित मिति: बिहीबार, मंसिर २२, २०७९ ११:०६
