काठमाडौं– कवि तथा गीतकार तारा पराजुलीद्वारा रचित प्रेमपरक गीत ‘सहारा हौ मेरो दिलमा घर गरेको मान्छे तिमी, सत्य हजुर हजारौँमा मन परेको मान्छे तिमी’ बोलको गीतमाथि निर्मित भिडियो सार्वजनिक भएको छ । भिडियो ओएसआर डिजिटलको युटुब च्यानलमार्फत् सार्वजनिक भएको हो ।
मोरङको बेलबारी नगरपालिकाकी उपमेयरसमेत रहेकी ‘अर्को राजमार्ग’ कविताकृतिकी सर्जक गीतकार पराजुलीको गीति–रचनामा सङ्गीतकार भीम बिसीद्वारा संगीतबद्ध गीतमा स्वयम् बिसी र गायिका सरु गौतमको सुमधुर स्वर रहेको छ । संगीत संयोजनचाहिँ पुष्कर सुनुवारको रहेको छ ।
सुन्दर लोकेशनमा छायाङ्कन गरिएको गीतको भिडियो दीपक एम सिंहले निर्देशन गरेका हुन् । भिडियो छायाँकन दीपक गिरीले गरेका छन् । सम्पादन अमृत चापागाईँको रहेको छ । भिडियोमा दिनेश कठायत ‘काजी’ र रजिना बिष्टको अभिनय रहेको छ ।
