काठमाडौं – पाल्पा, गुल्मी, अर्घाखाँची, स्याङ्जा, पर्वतलगायत जिल्लाका किसानको कृषिउपज भण्डारण गर्न निर्माण सुरु गरिएको चिस्यान केन्द्र १० वर्षदेखि अलपत्र छ ।
पाल्पाको तानसेन नगरपालिका–७ बाघखोरमा दुई वर्षमा सक्ने गरि निर्माण सुरु भएको चिस्यान केन्द्रको १० वर्षमा २७ प्रतिशत मात्र काम सकिएको छ ।
३३ फिट अग्लो, २६ मिटर लम्बाई र १४ मिटर चौडाईको चिस्यान केन्द्र, दुई हजार टन कृषिउपज राख्न सकिने क्षमताको छ । भारतीय राजदूतावासको सहयोगमा निर्माण थालिएको हो । चार करोड ९९ लाख ९१ हजार नौ सय पाँच रूपैयाँमा निर्माण गर्ने सम्झौता भएको थियो ।
विसं २०६९ फागुन २३ गते सम्झौता गरेको निर्माण कम्पनीले २०७१ जेठ २३ गते काम सक्ने लक्ष्य थियो । दश वर्षमा निर्माण कम्पनीले २७ प्रतिशत मात्र भौतिक प्रगति गरेको तानसेन नगरपालिकाका प्राविधिक टिकाराम सोमैले जानकारी दिए ।
उनले भने, ‘निर्माण कम्पनीले काम नै गरेन, पाँच पटक म्याद थप गरिसकेका छौँ । फेरि म्याद थपको लागि आएको छ । काम गर्छन् भन्नेमा विश्वस्त हुन सकिएको छैन ।’
यस क्षेत्रमा तत्काल बजारमा खपत हुनेभन्दा बढी उत्पादन भएका तरकारी, फलफूल, अदुवा, दूधलगायत कृषि उत्पादन भण्डारण गर्न किसानको मागअनुसार केन्द्र निर्माण सुरु गरिएको थियो ।
तानसेनमा सो केन्द्र निर्माणपछि उत्साही यहाँका कृषक निर्माण कार्यमा भएको ढिलाईले पुनः निरूत्साही भएका छन् । निर्माण कम्पनी हिमडुंग एन्ड थोकर र जय रक्तकाली जेबीले तानसेन नगरपालिकाबाट दुई करोडभन्दा बढी रकम भुक्तानी लगिसकेको छ ।
आर्थिक सहयोग गरेको भारतीय राजदूतावासले चिस्यान केन्द्रको अवलोकन गरेको छ । दूतावासका द्धितीय सचिव प्रशान्त सोनाले निर्माण कार्य सुरु गर्न अनुरोध गरेको तानसेन नगरपालिकाका सूचना अधिकारी भरत आचार्यले जानकारी दिए ।
समयमा काम सम्पन्न नभएपछि तानसेन नगरपालिकाले पूर्वनिधारित क्षतिपूर्ति ४८ लाख रकम तिर्न निर्माण कम्पनीलाई पत्राचार गरेको थियो ।
पूर्वनिर्धारित योजना र सम्झौताअनुसार काम नगरेको भन्दै पटकपटक परिपत्र गर्दै आएको नगरपालिकाले अन्य कम्पनी छनोट गरेर भए पनि योजना सम्पन्न गर्ने उल्लेख गरेको छ ।
प्रवक्ता यादवसिंह कार्कीले नपुग रकम नगरपालिकाबाट थप गरेर भए पनि निर्माण सुरु गरिने बताए । उनले भने, ‘तानसेनको गौरवसँग जोडियो, निर्माण कम्पनी परिवर्तन गरेर भए पनि काम सम्पन्न गर्छौं’
पाल्पा कृषि क्षेत्रको उर्बर भूमि हो । यहाँका किसानले सुन्तला, अकबरे खुर्सानी, अदुवाजस्ता कृषिउपजबाट करोडौँको व्यापार गर्छन्
प्रकाशित मिति: शनिबार, पुस ९, २०७९ १२:०८
