काठमाडौैं– नेपाली फिल्म ‘शेल्फी किङ’को नयाँ गीत सार्वजनिक भएको छ । यही २४ माघमा रिलिज हुने यस फिल्मकोे ‘जिन्दगीको के छ र भर?’ बोलको गीत सार्वजनिक भएको हो ।
सार्वजनिक गीतमा फिल्ममा मुख्य कलाकार विपिन कार्की फिचर्ड छन् । सुभाष भुषालले संगीत रहेको उक्त गीतमा केतन क्षेत्रीको स्वर छ भने गीतरचना सुरज गैरे ‘विवस’ले गरेका हुन् ।
यस फिल्ममा विपिनसँगै लक्ष्मी वर्देवा, भुवन चन्द, अभय बराल, लोकमणि सापकोटा, जीवन भट्टराई, सबिन बास्तोलालगायतका कलाकारको अभिनय छ । एक हास्यकलाकारको जीवनमा आधारित यस फिल्मको निर्देशक विशाल सापकोटा हुन् ।
निर्देशक सापकोटाकै कथामा सुशन प्रजापतिको छायाङ्कन, जीवन थापाको सम्पादन र निर्मलकुमार थापाको कोरियोग्राफी रहेको यस फिल्मलाई दिनेश राउत र सुभाष थापा मिलेर निर्माण गरेका हुन् ।
