सिड्नी–अस्ट्रेलियाको सिडनीबाट दक्षिणपश्चिमी भागमा आगो निभाउने कार्यमा खटिएको एउटा ट्याङ्कर बिमान बिहीबार दुर्घटनाग्रस्त भएको छ । अधिकारीका अनुसार विमानमा सवार चालक दलका तीन जना अमेरिकीको मृत्यु भएको छ ।
न्यू साउथ वेल्सको ग्रामीण अग्निनियन्त्रण सेवाका आयुक्त शेन फिट्सिमन्सले क्यानाडाली कम्पनीको सी–१३० हर्कुलस विमानसँग स्थानीय समयअनुसार बिहीबार अपराह्न १.३० बजे सञ्चार सम्पर्क बिच्छेद भएको बताए । उक्त जहाज स्लोई मोनारो क्षेत्रमा खटिएको थियो ।
फिट्सिमन्सले दुर्घटनामा चालक दलका तीनै जना सदस्यको मृत्यु भएको र उनीहरू संयुक्तराज्य अमेरिकाका बासिन्दा रहेको जानकारी दिए । अष्ट्रेलियाको जङ्गलमा लागेको विनाशकारी डढेलो नियन्त्रणमा सघाउन उनीहरूलाई संयुक्तराज्य अमेरिका सरकारले खटाएको थियो ।
उनका अनुसार मारिने तीनै जना निकै अनुभवी रहेको पनि बताए ।
गतवर्ष सेप्टेम्बरमा शुरु भएको यस विनाशकारी डढेलोमा परेर कम्तीमा ३२ जनाको मृत्यु भइसकेको छ ।
यस दुर्घटनाको कारण तत्कालै थाहा हुनसकेको छैन, तर फिट्सिमन्सले तीव्र बेगको हावाका कारण पानी बोक्ने ठूला बिमानको उडानलाई ‘धेरै गाह्रो’ बनाइरहेको बताए ।
विमानको स्वामित्व रहेको क्यानाडाली फर्म कउल्सन एभिएसनले न्यू साउथ वेल्स र भिक्टोरियामा आगलागी नियन्त्रणमा प्रयोग गरिरहेका अन्य ठूला एयर ट्याङ्कर सञ्चालनलाई तत्काल स्थगन गरेको जनाएको छ । (रासस÷एएफपी)
