काठमाडौं — सहिद स्मारक ‘ए’ डिभिजन लिग फुटबलको बिहीबार सम्पन्न खेलमा जावलाखेल युथ क्लब र थ्रीस्टार क्लब विजयी भएका छन् । त्रिपुरेश्वरस्थित दशरथ रंगशालामा सम्पन्न खेलमा जावलाखेल युथ क्लबले सशस्त्र प्रहरीको एपीएफ क्लबलाई १–० ले पराजित गरेको छ भने हिमालयन शेर्पा क्लबलाई ३–१ गोल अन्तरले पराजित गर्दै थ्री स्टार लिगको शीर्ष तीनमा उक्लिएको छ ।
जावलाखेललाई जित दिलाउन विदेशी खेलाडी फोडे फोफानाले निर्णायक गोल गरे । फोफानाले खेलको ७१ औँ मिनेटमा गोल गरेका हुन् । खेलको ५७ औं मिनेटमा जावलाखेल १० खेलाडीमा समेटिएको थियो । गोलकिपर टेकेन्द्र थापाले रातो कार्ड पाएपछि जावलाखेलले १० खेलाडीमा रहेर खेलेको थियो । एपीएफका आशिष लामासँग वान भर्सेस वानमा अवस्थामा डिबक्सको ठिक बाहिर ह्याण्ड गरेपछी रेफ्री कबिन ब्यन्जनकारले गोलरक्षक टेकेन्द्रलाई सिधै रातो कार्ड देखाएका थिए । तर, एपीएफले त्यसको फाइदा उठाउन सकेन । खेलको ६९ मिनेटमा जावलाखेलले गोल गर्ने सुन्दर मौका पाएको थियो । तर, उसका सुजित बुढाथोकी चुके । खेलमा जावलाखेलका फोडे म्यान अफ दि म्याच चुनिए ।
एपीएफमाथिको जितसँगै जावलाखेल लिगको पाँचौं स्थानमा उक्लिएको छ । जावलाखेलले ८ खेलमा १२ अंक जोडेको छ । पराजित एपीएफ ८ खेलमा ५ अंक जोडेर पुछारबाट दोस्रो स्थानमा रहेको छ ।
त्यस्तै शुसिल राई, सन्जोग राई र ओलानडिरन हाजमतको एक एक गोलको मद्दतले थ्री स्टारले हिमालयन शेर्पाविरुद्ध सहज जित हात पार्याे । स्टेफेन समिरले सान्त्वना स्वरूप शेर्पाका लागि एक गोल फर्काए पनि जितका लागि उनको गोल काफी भएन । तुलनात्मक कमजोर टिम शेर्पाविरुद्ध खेलको छैटौं मिनेटमा शुसिलले गोल गर्दै थ्री स्टारलाई १–० को अग्रता दिलाएका थिए ।
पहिलो हाफमा थप गरिएको इन्जुरी समयको पहिलो मिनेटमा स्टेफेनले गोल गर्दै शेर्पालाई १–१ को बराबरीमा ल्याए । तर, त्यसको एक मिनेटपछि सन्जोगले गोल गर्दै पहिलो हाफमा थ्री स्टार २–१ को अग्रता दिलाए । त्यसपछि खेलको ५० औं मिनेटमा निशान खड्काको पासमा शेर्पाका गोलकिपर किशोर गिरीलाई बिट गर्दै हाजमतले उत्कृष्ट गोल गर्दा थ्री स्टारले ३–१ को सहज जित निकाल्यो ।
खेलमा थ्री स्टारका सन्जोग म्यान अफ दि म्याच चुनिए । जितसँगै तेस्रो स्थानमा उक्लिएको थ्री स्टारले ८ खेलमा १४ अंक जोडको छ । शेर्पाले ८ खेलमा ७ अंक जोडेको छ । शेर्पा लिगको ११ औं स्थानमा रहेको छ ।
