काठमाडौं– तामाङ समुदायले नयाँ वर्ष २८५६ अर्थात सोनाम ल्होछार शनिबार भव्यरूप मनाएको छ । हरेक वर्ष माघ शुक्लपक्ष प्रतिपदाका दिन नयाँ वर्षारम्भका रूपमा तामाङ जातिले यस पर्वलाई मनाउने गर्दछन् ।
यस पर्वले तामाङ समुदायको परम्परागत संस्कृतिको संरक्षण र सम्वद्र्धनमा योगदान पुर्याउँदै आएको छ । बाग्मती प्रदेशका १३ जिल्लामा तामाङ समुदायको बाहुल्यता रहेको पाइन्छ ।
यस्तै मुलुकका विभिन्न जिल्लाबाट काठमाडौं आएर विभिन्न पेशा व्यवसायमा संलग्न तामाङ समुदाय नयाँ वर्षका उपलक्ष्यमा टुँडिखेलमा आयोजित सांस्कृतिक महोत्सवमा सहभागी भएका थिए । सो अवसरमा आयोजित कार्यक्रममा तामाङ समुदायका युवा नेता एवं सांसद प्रेम तामाङ, तामाङ समुदायका अगुवा राजनीतिज्ञ कमानसिंह तामाङ, पर्शुराम तामाङलगायतले आफ्नो समुदायले उठाएका मुद्दालाई सरकार र प्रमुख राजनीतिक दलबाटै सम्बोधन गर्न कञ्जुस्याइँ गरेको भनी गुनासो गरे । तामाङ जातिको मात्र नभई स्वदेश तथा विदेशमा रहेका सम्पूर्ण नेपाली जातिको चाडका रूपमा रहेको सोनाम ल्होछार पर्वलाई सरकारले बेवास्ता गरेका भनी सो अवसरमा उनीहरूले दुखेसो व्यक्त गरे ।
महोत्सवमा तामाङ समुदायको संस्कृति, भेषभूषा झल्कने सांस्कृतिक कार्यक्रम प्रस्तुत गरिएको थियो । महोत्सवमा उक्त समुदायको परिचय गराउने १०० भन्दाबढी खानपिनका कक्ष सञ्चालन गरिएको थियो । महोत्सवमा तामाङ समुदायका युवायुवतीको ठूलो संख्यामा सहभागिता देखिन्थ्यो । ल्होसार उद्घाटन कार्यक्रममा राष्ट्रपति विद्या भण्डारी भने गइनन् । यसअघि टुँडिखेलमा हुने ल्होसार कार्यक्रमको उद्घाटन राष्ट्रपति भण्डारीले गर्ने तय भएको आयोजकले जनाएको थियो । तर, अन्तिम क्षणमा आएर राजनीति नारा भएको भन्दै राष्ट्रपति भण्डारी कार्यक्रममा नगएको बताइएको छ ।
यसैबीच उपराष्ट्रपति नन्दबहादुर पुनले नेपालका मौलिक कला संस्कृतिले सम्पूर्ण नेपालीबीच आपसी सद्भाव, सामाजिक एकता र भातृत्व कायम गर्ने विश्वास व्यक्त गरेका छन् ।
तामाङ समुदायको महान् सांस्कृतिक चाड ‘सोनाम ल्होछार–२८५६’ को अवसरमा शनिबार शुभकामना सन्देश दिँदै उनले यस पर्वले तामाङ समुदायको मौलिक संस्कृतिको संरक्षण तथा सम्वद्र्धन साथै आपसी सद्भाव, प्रेम, भातृत्व, सहिष्णुता र एकता प्रवद्र्धन गर्न सहयोग पु¥याउने बताए ।
काठमाडौं उपत्यका आसपासमा आदिमकालदेखि बसोबास गर्दै आएका तामाङ समुदायको मौलिक भाषा, लिपि, संस्कृति, रितिरिवाज, भेषभूषासहितको विशिष्ट पहिचान रहेको भन्दै उनले तामाङ सेलो गीत, टुङ्ना र डम्फुको संगीत नेपालका सम्पूर्ण जातजातिको लोक भाकाको अभिन्न अंग बनेको बताए ।
मौलिक कला, संस्कृतिको संरक्षण तथा सम्वद्र्धनमा राज्यको प्रमुख दायित्व रहेको उल्लेख गर्दै उपराष्ट्रपतिले राष्ट्रको पहिचान र अमूल्य निधिका रूपमा रहेका कला संस्कृतिकको संरक्षणमा सबैको ध्यान जाने विश्वास व्यक्त गरे ।
