नेपाल वैदेशिक रोजगार व्यवसायी संघको भोलि शुक्रबार हुन गइरहेको निर्वाचनमा प्रगतिशील व्यवसायी समूहको राजेन्द्र भण्डारी प्यानलबाट रोशन कटवालले तृतीय उपाध्यक्ष पदका लागि उम्मेदवारी दिएका छन् । उक्त पदमा उम्मेदवारी दिनुको उद्देश्यलगायत संघको निर्वाचन सम्बन्धमा प्रभावले लिएको उम्मेदवार कटवालसँग गरेको कुराकानीको सारांशः
तपाईंको उम्मेदवारी किन, एजेण्डा के–के छन् ?
मेरो उम्मेदवारी व्यक्तिगत हुँदै होइन, साझा उद्देश्यका लागि काम गर्ने हो । व्यवसायीहरुको हितमा काम गर्नेछु । आज कुनै प्यानलमा भए पनि निर्वाचनपश्चात् हामी व्यवसायी एक हौ भन्नका लागि मेरो उम्मेदवारी हो । तृतीय उपाध्यक्षको हैसियतमा त्यस्तो ठूलो भूमिका पनि हुँदैन । हामी राजेन्द्र भण्डारी प्यानलको नेतृत्वमा निर्वाचनमा भाग लिइरहेका छौं र साझा एजेण्डा सार्वजनिक गरिसकेका छौं । यसलाई सबै व्यवसायीज्यूहरुले मनन गरिदिनुहुनेछ भन्ने विश्वास लिएको छु ।
व्यवसायीका समस्याहरु समाधानका लागि तपाईंको भूमिका कस्तो रहन्छ ?
आज २९औं साधारणसभासम्म आइपुग्दा हामीले थुप्रै समस्या र बेथिति भोगेका छौं । यसको समाधानका लागि हाम्रो टिम नै लाग्ने छ । तर पनि व्यक्तिगतरुपमा भन्नुपर्दा व्यवसायीले लिने सेवा शुल्कका कुरा, रोजगारीका लागि विदेश जानेहरुका समस्या र सरकारले व्यवसायीहरुलाई हेर्ने नजरमा परिवर्तन ल्याउन अग्रज व्यवसायीहरु र संघका पूर्वअध्यक्ष तथा पदाधिकारीहरुसँग बसेर र आम व्यवसायीहरुसँगको परामर्शबाट एउटा निचोड निकाल्ने पहल हुन्छ । हामीलाई सरकारले नै दलालको ट्याग लगाएको छ, त्यसलाई चिर्ने गरी व्यवसायलाई कसरी मर्यादित र सम्मानित बनाउन सकिन्छ भन्नेमा हाम्रो टिम कटिबद्ध भएर लाग्नेछ ।
संघको निर्वाचनमा चारवटा प्यानल खडा छन् । यस्तो अवस्थामा तपाईंको जित कति सुनिश्चित छ ?
यो लोकतान्त्रिक पद्धतिमा सबैले चुनावमा भाग लिन पाउँछन् । यसमा आ–आफ्नो इन्ट्रेस्टको कुरा होला । तर, कतिवटा प्यानल छ भन्नेले खासै अर्थ राख्दैन । मैले आफूमात्र जितेर हुँदैन टिमलाई जिताउनुपर्ने दायित्व छ । म भनौं या हाम्रो टिमको जितका लागि व्यवसायीलाई दिने सन्देश महत्वपूर्ण कुरा हो ।
हाम्रो टिम एक जुट छ, हामीभित्र कुनै मतभेद छैन र सम्पूर्ण व्यवसायीहरुले हामीमाथि भरोसा गरेका छन् । तृतीय उपाध्यक्षको दाबी गरिरहँदा मैलै अन्य प्रतिस्पर्धीहरु छन् भन्ने देखेको छैन । यही पेसा व्यवसायमा दुई दशक बिताइसकेको छु, थुप्रै कठिनाइ र समस्याबीच पनि व्यवसायीहरु साथीहरुसँग आत्मीयता साट्दै आएको छु । यस्तो अवस्थामा मेरो जित निश्चित नै छ, यतिमात्र नभएर हाम्रो टिमको नै जित सुनिश्चित छ ।
व्यवसायीबीच अस्वथ्य प्रतिस्पर्धा पनि हुने गरेको बताइन्छ । यसप्रति तपाईंको भूमिका के हुन्छ ?
जो व्यवसायी गलत क्रियाकलापमा संलग्न हुन्छ, त्यस्तालाई ट्र्याकमा ल्याउने दायित्व सबैको हो । तर पनि संघको नेतृत्वदायी भूमिकामा रहेका व्यक्तिहरुको अझै बढी हुन्छ । कतिपय अवस्थामा व्यवसायीहरुबीच अस्वस्थ प्रतिस्पर्धा पनि हुने गरेको छ । म यो वा त्यो भन्दिनँ तर सबै खाले अस्वस्थ प्रतिस्पर्धाको विरुद्ध व्यवसायीहरुसँगै समन्वय गरेर खरो रुपमा उत्रिने प्रण गर्दछु ।
अन्त्यमा, आम मतदाता व्यवसायीहरुलाई के भन्नुहुन्छ ?
वैदेशिक रोजागरको क्षेत्र एकदमै संवेदनशील क्षेत्र हो । यसले हाम्रो दैनिक जनजीविकामा ठूलो प्रभाव पारेको छ । वैदेशिक रोजगार देशको समग्र अर्थतन्त्रको मेरुदण्ड नै हो । हामीले ठूलो जोखिम मोलेर वेरोजगारी समस्या हल गर्न मद्दत पु¥याएका मात्र छैनौं रेमिट्यान्स भित्र्याउने भरपर्दो आधार तय गरेका छौं ।
यस्तो क्षेत्रमा संलग्न हामी सबै व्यवसायीले आफ्नो व्यवसायलाई अझ मर्यादित, सुरक्षित र सम्मानित बनाउने जिम्मेवारी हाम्रै काँधमा छ । हामी चुनावमा उठ्दा यो प्यानल त्यो प्यानल भनेर राजनीति गर्छौं । तर, राजनीतिभन्दा पहिला हामी व्यवसायी हौं, व्यवसायीका हकहितका लागि नै पूर्णरुपमा लाग्ने प्रतिबद्धता व्यक्त गर्दछु ।
प्रकाशित मिति: बिहीबार, माघ ५, २०७९ ०९:०७
