ललितपुर– ललितपुरको भैंसेपाटीमा एक टहरामा आगलागी हुँदा एक जनाको मृत्यु भएको छ।
शनिबार बिहान साढे ३ बजे भैंसेपाटीस्थित फूलबारी मार्गमा रहेको एक टहरामा आगलागी भएको जिल्ला प्रहरी परिसर ललितपुरका एसपी प्रविण पोखरेलले जानकारी दिए। उक्क्त आगलागिमा दुर्गा श्रेष्ठको जग्गामा टहरा बस्दै आएका एक जना महिलाको मृत्यु भएको हो।
धनकुटा घर भई हाल उक्त टहरामा बस्दै आएकी ३९ वर्षीय नम्रता राईको मृत्यु भएको एसपी पोखरेलले बताए। उनी उक्त टहरामा एक्लै बस्दै आएकी थिइन्।
उनका अनुसार टहरामा पूर्ण रूपमा क्षति पुगेको छ। प्रहरीको प्रारम्भिक अनुसन्धानमा बिजुली सर्ट भएर आगलागि भएको हो कि भन्ने देखिएको छ ।
आगोलाई ललितपुर पुल्चोकबाट गएको दमकल र स्थानीय प्रहरीको सहयोगमा बिहान ४ बजे नियन्त्रणमा लिइएको थियो। बिहान ९ बजे पोष्टमर्टमको लागि शव पाटन अस्पताल पुर्याएको छ।
प्रारम्भिक अनुमान अनुसार आगलागीबाट अन्दाजी साढे १ लाख बराबरको क्षति पुगेको छ। घटनाको थप अनुसन्धान भइरहेको प्रहरीले जनाएको छ।
प्रकाशित मिति: शनिबार, माघ ७, २०७९ १६:०३
