काठमाडौं– सत्तारुढ नेपाल कम्युनिष्ट पार्टी (नेकपा)का सचिवालय सदस्य वामदेव गौतमले पार्टीले कार्यकर्ताका लागि हालै जारी गरेको आचारसंहिता संस्कृति सुधारका लागि एउटा पहल भएको बताएका छन् ।
आइताबार पार्टीको जनवर्गीय संगठन जनसांस्कृतिक महासंघ नेपाल र यसका सात घटक संगठनको केन्द्रीय कमिटीको शपथ कार्यक्रममा नेता गौतमले समाज रूपान्तरणको तल्लो एकाइ परिवारलाई सुधार गर्न नसक्नेले समाजलाई बदल्न नसक्ने बताए । उनले नेकपाले भर्खरमात्रै आचारसंहिता जारी गरेको भन्दै संस्कृति सुधारको पछिल्लो प्रयासलाई ‘सार्थक प्रयास’ हुने बताए ।
उनले नेपालको आवश्यकता र औचित्यअनुरूप वैज्ञानिक समाजवाद ल्याउनुपर्नेमा जोड दिँदै अन्य मुलुकको जस्तै शासन व्यवस्था यहाँ हुनुपर्छ भन्ने नरहेको स्पष्ट पारेका छन् । नेता गौतमले सांस्कृतिक क्रान्ति आर्थिक क्रान्तिको वाहक भएको बताउँदै संस्कृतिकर्मीले देश निर्माणको युगमा होमिन सघाउने खालका साहित्य सिर्जना हुनुपर्नेमा जोड दिए । उनले भने, ‘साम्राज्यवाद रहँदासम्म समाजवाद आउन सक्दैन । साम्राज्यवादलाई परास्त पार्दै नेपालको माटो सुहाउँदो समाजवादका विषयमा बहस गरौँ ।’
नेकपा नेतृत्वको करीब दुई तिहाइको सरकारले परिवर्तनलाई संस्थागत गर्नुपर्ने बताउँदै उनले राष्ट्रियसभाको निर्वाचनपछि नेकपाले सो सदनमा दुई तिहाइ स्थान हासिल गरेको जनाए । उनले भने, ‘जनताले परिवर्तनको स्वाद चाख्न पाउने गरी सरकारले काम गर्नुपर्छ । अर्को निर्वाचनमा जनताले अघिल्लो निर्वाचनको घोषणापत्र पल्टाएर प्रश्न गर्ने स्थिति सिर्जना गर्नुहुँदैन । परिणाम दिन सकेनौँ भने भयावह हुनेछ, त्यसको फाइदा प्रतिस्पर्धी दलले लिनेछ ।’
यसै अवसरमा नेकपाका महासचिव विष्णुप्रसाद पौडेलले क्रान्ति सम्पन्न गर्न जति कठिन हुन्छ उपलब्धि जोगाउन झनै गाह्रो हुने भन्दै सांस्कृतिक रूपान्तरणका लागि धेरै कार्य गर्नुपर्नेमा जोड दिएका छन् ।
नेकपा स्थायी कमिटी सदस्य तथा संस्कृति विभागका प्रमुख मणि थापाले संस्कृतिकर्मीले गरेको कार्यलाई तल्लो तप्काका नागरिकले समेत अनुभूति गर्ने बताउँदै कलाकार र साहित्यकारको भूमिकालाई राज्यले कदर गर्नुपर्ने बताए । उनले प्रत्येक व्यक्तिले आफ्नो चरित्र सुधार गर्नुपर्नेमा जोड दिँदै पार्टीभित्र हावी भएको व्यक्तिवादी सोचको अन्त्य गरिनुपर्ने बताए ।
प्रकाशित मिति: सोमबार, माघ १३, २०७६ ०९:४७
