वैकुण्ठ भण्डारी- कुरो १२ भाइको हो । ‘कालेकाले मिलेर खाउँ भाले’ भनेजस्तै भो । उग्रवामपन्थीहरुको भीडमा उग्र पश्चिमान्थी देखिएपछि यस्तै हो । आफूलाई राम्रो हुञ्जेल सबै राम्रो आफूलाई राम्रो हुन छाडेपछि सबै बिरानो ।
हिजोसम्म खिसीटिउरी गर्दै अरुलाई सत्तोसराप गर्दा मज्जाले हाँस्न जति मजा आएको थियो, आफूलाई पर्दा १२ भाइले साथ नदिएपछि १३ कुरा त ठोक्नै प¥यो । कस्ता–कस्ता आए गुलेली खेलाए मट्याङ्ग्राको सत्यानाश !
म हुँ भन्ने अहमताले आफ्ना वरपर भएकालाई पनि बिगार्छ । मट्याङ्ग्राहरु खुसीले दंग पर्दछन् हुन पनि हो । हिजोसम्म ‘तैँ चुप मै चुप’ आफूलाई चोट परेपछि १३ कुरा गर्न छुट ! यही हो नि प्रजातन्त्र भनेको ?
कम्तीमा मनका वह पोख्न त पाका छन् । गललल हाँस्न त भ्याका छन् । सर्पका खुट्टा सर्पलाई मात्र थाहा हुन्छ भनेजस्तो अब खोलौं न रमेर पोलापोल ।
मुलुक कसले चलायो ? नेताले ? होइन । मन्त्री प्रधानमन्त्री कसले छान्यो जनताले होइन ? जनताले त नेता छाने अरु सबै उत्तर–दक्षिण वारी समुद्रपारीसम्मले छाने । उसैले छान्यो, उसले हान्यो !
१२ भाइका कुरा पनि ठीकै हो । अन्नदाताहरुलाई नै असर पर्नेगरी काम गर्न त कहाँ पाइन्छ त ? देश चलाउन खोज्ने १२ भाइका मालिकहरु कहाँ–कहाँबाट चलेका छन् ? कुन इसारामा चलिरहेका छन् भन्ने कुरा फिरंगीहरुलाई मात्र थाहा छ । किनकि, सबै फिरंगीहरुले नै चलाएका छन् । एउटा फिरंगीले चाल पाएको जस्तो गरेर कहाँ हुन्छ र ? ऊ बेला मट्याङग्राले सार्वजनिक गरेकै हो क्यार ! नेपालाँ शक्तिशाली भनेकै नादरमुनिहरु हुन् । ती नारदमुनिहरु परिचालित हुन् आफूलाई राम्रो भए ठीक नभए बेठीक भन्छन् । ख्वामित्हरुले जे–जे भन्छन् त्यही नै गाउने हुन् ।
अहिले १२ भाइको टाउका गनेर के काम । सूर्य पश्चिमबाट अस्ताउने हो, कहिलेकाहीँ पूर्वबाट पनि अस्ताउँछ त्यसमा धन्दा मान्नु पर्दैन भन्नेको संगताँ परेपछि गाई र गोरु छुट्याउन सक्नुपर्छ । नेपालाँ चलेका र चलाइएका नारदमुनिहरुका कारखाना चल्नका लागि कच्चा पदार्थ कसरी आइरहेको छ । कच्चा पदार्थको स्रोत के हो भन्ने कुरो त पदाँ बस्दा नै खोजविन गर्ने हो, अनि नारायण नारायण भन्ने हो ।
सूर्य अस्ताइसके पनि पनि बादलले छेक्यो भनेर ढाँट्ने त ढुण्डुकारी पो हो त ! आफूले जसरी ढाँटेको हो त्यसैगरी ढाँटिएका छन् । कोदो रोपेर तोरी उम्रँदैन । तोरी उमार्न त तोरीकै बीउ राख्नु परो नि, कि कसो नारदजी ? नारदजीले भनेको कुरा सबै ठीक हुन्छ भन्ने पनि त छैन । सबै बेठीक नै हो भन्न पनि भएन । छान्ने काम त मट्याङ्ग्रा बबुराहरुको हो नि ? छान्न जान्नुप¥यो ।
अब १२ भाइ र तिनका ख्वामित कसरी बाँचेका थिए भन्ने कुरा एक छिन् भटभट्याएर हुने हो ? रिसाँ झोकाँ ठोक्दिए भनेर पनि भएन । आफू भलो त जगतै भलो गर्नु प¥यो नि ? के–के न खान पाइन्छ भनेर उफ्रँदै ‘बा’हरुको शरणमा परेपछि ‘बा’हरुले जसरी नचाउँछन् त्यसैगरी नाच्नुप¥यो । ‘नो नट अगेन’ भन्दै ‘ऐट अगेन’ भन्दै हिँडेपछि स्यालहुँइया गरेर हुन्छ ?
नारदमुनिका ख्वामितहरुले हिजो के गरे, आज के गरिरहेका छन् र भोलि के गर्छन् भन्ने कुरा त उही ख्वामितहरुका पनि मालिकहरुलाई थाहा होला ? विचरा, यी मट्याङ्ग्राले घाँटीको नसा चुँडिनेगरी कराएर हुने भैदिएको भए पहिले नै भइसक्थ्यो । आफू मालिक बन्दा के भाको थियो अरु मालिक बन्दा के हुने रैछ ? १२ भाइका १३ कुरासँग आफैं १३ भाइ हो भन्ने कुरा पनि त नारदमुनिहरुलाई जानकारी होला !
भिड्न नै मट्याङ्ग्राहरु तयार हो भने आऊ, मिलेर भिडौं । के साँच्चै देश बनाउने खोजेको हो त ? त्यसो भए तिम्रा सम्पत्ति शुद्धीकरण गरौं अनि तिम्रा १२ भाइ, १२ भाइका ख्वामितहरुको पनि हरहिसाब केलाऊ । जबसम्म नारदमुनिका कारखानामा ख्वामितहरुको रजगज भइरहन्छ तबसम्म मट्याङ्ग्राहरुको केही लाग्दैन ।
२०४६ सालदेखि हेर्ने हो भने नारदमुनिका कारखानाहरु कसरी चलिरहेका छन् ? २०६२/६३ पछि कसरी कारखानाहरुको बाढी आइरहेको छ ? १२ भाइका ख्वामितहरु हिजो मुसा थिए अहिले कसरी हात्ती भएका छन् । कसले खोज्ने ? रिसाँ झोँक देखाएर मात्र त हुन्न बरी लै । शक्तिमा भएका बेला गर्ने हो, शक्तिबाट लोपारेपछि के अर्थ छ र ? विचरा, बबुरा १२ भाइ त ख्वामितहरुका दास हुन् । जसो–जसो अह्राएको छ उसै गर्ने हो । १३ भाइका रुपमा आफैं ख्वामित बनेको होइन र बरी लै !
ख्वामित बन्नु र नारदका १२ भाइछोराको कुरा गर्नु पनि हात्ती र हात्तीछाप भनेजस्तै भएन र ? माटोलाई माया गरेकै हो भने त किन मट्याङ्ग्राहरुलाई झुक्याउनुपर्ने थियो । एमसिसी कसले पास गर्न लगाए बरी लै ? एमसिसीका विरुद्ध किन मौन बस्यो बरी लै ? घोक्रो त अरुले भने फुटाउन खोजेकै थिए त ? तर, सकेनन् घोक्रोको सट्टा टाउको फुटाए, एमसिसी ल्याए । बात कर्ता है ! ‘डु यु अण्डरस्ट्याण्ड’ मट्याङ्ग्रा ? सत्य सत्य नै हो नारदका कारखानाहरु स्वचालित होइनन् परिचालित नै हो । विभिन्न मुहारबाट परिचालित नारदमुनिका कारखानाका कारणले नै तीन कोटी मट्याङ्ग्राहरुले दुःख पाइरहेका छन् । खुसीको अनुहार कहिल्यै देखाउन पाएका छैनन् । ती कारखानाहरु परिचालित भइरहँदासम्म त्यही कारखानामा बसेर नारदमुनिहरु ख्वामितहरुको इशारामा मट्याङग्राहरुलाई सिध्याउने र राज गर्नेमा नै तल्लीन थिए, छन् र हुने छन् ।
कुन भाइले कसको कुरा काट्यो ? कुन भाइ कुन फिरंगीसँग बस्यो ? कुन भाइले कुनचाहिँको ठेक्का पायो भन्ने कुरा त १३ भाइलाई त अवगत नै थियो । यत्तिका वर्षसम्म १३ भाइ गुपचुप किन ? मट्याङ्ग्राले थाहा पाउनुपरो नि ? १२ भाइ त परिचालित थिए, छन् । १३ भाइ पनि त परिचालित हो त्यसको छिनोफानो १३ भाइबाटै सुरु गर्दा कसो होला । ‘१२ छोरा १३ नाती, बूढाको धोक्रो काँधै माथि’ त नहोला नि ?
प्रकाशित मिति: मंगलबार, माघ २४, २०७९ १६:०२
