पोखरा- कास्कीको पोखरालाई आर्चरी खेलको राष्ट्रिय तथा अन्तर्राष्ट्रिय गन्तव्य बनाउने लक्ष्यसहित प्रदेशस्तरीय खुला प्रतियोगिता सञ्चालनको तयारी गरिएको छ ।
पोखरा रङ्गशालास्थित आर्चरी मैदानमा यही फागुन ५ गतेदेखि सञ्चालन हुने उक्त प्रतियोगितामा गण्डकी प्रदेशका ११ वटै जिल्लाका खेलाडीको सहभागिता रहने छ ।
प्रदेश खेलकुद परिषद्को आयोजना र गण्डकी प्रदेश आर्चरी सङ्घको संयोजनमा हुने उक्त प्रतियोगितामा ९५ खेलाडीले उपाधिका लागि प्रतिस्पर्धा गर्ने कास्की जिल्ला आर्चरी सङ्घका अध्यक्ष योगेन्द्र शेरचनले जानकारी दिए ।
यसअघि पोखरा रङ्गशालाभित्रको आर्चरी मैदानमा १३औँ दक्षिण एशियाली खेलकुद (साग)को खेल खेलाइएका थिए । आर्चरी सङ्घले यहाँ वर्षेनी राष्ट्रियस्तरको प्रतियोगिता गर्दै आएको छ । प्रदेशस्तरीय खुला प्रतियोगितामा ‘रिकर्ब ओपन’ ७० मिटर र ‘स्टाण्डर्ट’ ३० मिटरको दूरीमा खेलाइने छ ।
प्रतियोगितामा रिकर्ब ओपन पुरुषतर्फ विजेतालाई रु ३० हजार, उपविजेतालाई रु २० हजार र तृतीयलाई रु १५ हजार पुरस्कार प्रदान गरिनेछ । यसैगरी रिकर्ब ओपन महिलातर्फका विजेतालाई रु १५ हजार, उपविजेतालाई रु १० हजार र तृतीय हुनेलाई रु पाँच हजार, स्टाण्डर्ट पुरुषतर्फको विजेतालाई रु २० हजार, उपविजेतालाई रु १५ हजार र तृतीय हुनेलाई रु १० हजार तथा ६० वर्ष उमेर माथिका खेलाडी (भेट्रान्स) को प्रतिस्पर्धामा प्रथम हुनेलाई रु आठ हजार, द्वितीयलाई रु पाँच हजार र तृतीयलाई रु तीन हजार पुरस्कार प्रदान गरिने आयोजकले जनाएको छ । प्रतियोगिताको मुख्य आर्थिक सहयोगी नेपाल ईन्भेष्टमेन्ट मेघा बैंक र पोखरा महानगरपालिका छन्
प्रकाशित मिति: बुधबार, फागुन ३, २०७९ ०९:२५
