काठमाडौं– सुनुवार कलाकार तथा चलचित्रकर्मी (सुकच)समाजको आयोजना र चलचित्र विकास बोर्डको सह–आयोजनामा ७ दिनले चलचित्र छायांकन कार्यशाला आईतबारबाट सुरु भएको छ ।
संघीय सुनुवार सेवा समाजको भवन कोटेश्वर बालकुमारीमा एक कार्यक्रमको आयोजना गरि कार्यशालाको उदघाटन गरेको हो । उदघाटन समारोहमा आदिवासी जनजाति चलचित्र महासंघका वर्तमान अध्यक्ष पूर्खजित राईको प्रमुख आतिथ्यबाट कार्यशालाको सुरु गरिएको हो ।
यस कार्यशाला फागुन १४ गतेदेखि २० गतेसम्म सञ्चालनमा रहने छ । कार्यशालाको शुभ–कामना दिँदै अध्यक्ष राईले आगामी दिनमा सुनुवार जातिको चलचित्रमा आफ्नो जातिय पहिचान र रहन सहन झल्किने खालको चलचित्र बन्नेमा आफु विश्वस्त रहेको बताए । उनले राष्ट्रिय तथा अन्तर्राष्ट्रिय बजारमा पनि जातिय पहिचान झल्किने खाल्का चलचित्र प्रवर्द्धन गर्ने प्रतिबद्धता जनाए ।
त्यस्तै किरात राई चलचित्रकर्मी संघका अध्यक्ष केशव राई ‘युप्स’ले कार्याशालाको शुभ–कामना दिँदै जातिय चलचित्र जति बन्नु पर्थ्यो त्यति बन्न नसकेको बताए । उनले कार्यक्रममा बोल्दै सुनुवारहरुको चलचित्र कमै मात्रमा बनेको र सुनुवारहरुले चलचित्र बनाउनप्रति लगाव नदेखाएको बताए । उनी भन्छन्, ‘ चलचित्र समाजको एना हो । दक्ष जनशक्ति उत्पादन गरी सुनुवारहरुको पहिचान झल्किने खालको चलचित्र बनाउनु जरुरी छ । ’
कार्यक्रममा सुकचका संस्थापक अध्यक्ष अमृत बहादुर सुनुवारले आदिवासी जनजाति चलचित्र महासंघको दुई कार्यकाल अध्यक्ष भएर पनि दक्ष जनशक्तिको अभावका कारण सुनुवार जातिको चलचित्र बनाउन नसकिएको बताए । कार्यशालको शुभ–कामना दिँदै सुनुवारले चलचित्र मनोरञ्जनको साधान नबनाउन र जातिय पहिचानको खोज अनुसन्धन गरेर चलचित्र बनाउन आग्रह गरे ।
कार्यक्रममा सुकचका उपाध्यक्ष लक्ष्मी सुनुवारले प्रशिक्षणबाट उत्कृष्ट र दक्ष जनशक्ति सुनुवार कलाकार तथा चलचित्रकर्मी समाजले पाउनेमा आफू विश्वस्त रहेको बताए । कार्यक्रममा सुजु सुनुवारको स्वागत मन्तव्य राखेका थिए भने कार्यक्रमको सञ्चालन निर्भिक सुनुवारले गरेका थिए ।
७ दिने यस कार्यशाला प्रशिक्षणमा पहिलो महिला सिनेमटोग्राफी सवनम मुखिया र ओस्कार कलेजका सिनेमटोग्राफी नकुल सुनुवारले प्रशिक्षार्थीहरुलाई प्रशिक्षण दिने छन् ।
प्रकाशित मिति: सोमबार, फागुन १५, २०७९ १३:२५
