काठमाडौं– ओमानस्थित मस्कटमा रहेको नेपाली दूतावासले दूतावासको छाप र पदाधिकारीको हस्ताक्षर दुरुपयोग गरी नक्कली मागपत्र (डिमाण्ड लेटर) बनाएर ठगी भइरहेकोबारे सचेत गराएको छ । दूतावासका अनुसार ठगीमा सक्रिय गिरोहले नक्कली मागपत्र प्रमाणीकरण गराइ नेपालमा रहेका म्यानपावरहरूलाई पठाएर झुक्याउँदै आर्थिक ठगी गर्ने गरेको पाइएको छ ।
दूतावासले मंगलबार एक विज्ञप्ति जारी गर्दै ठगी गर्ने गिरोहले मागपत्र प्रमाणीकरणसम्बन्धी कागजातहरू विशेषगरी बिहीबार नेपालमा रहेका म्यानपावरहरुलाई उपलब्ध गराउने र आइतबार मात्र दूतावासबाट वैदेशिक रोजगार विभागको अनलाइन प्रणाली सफ्टवेयर फेइम्स्मा अपलोड हुने भनी झुक्याउने गरेको उल्लेख छ । साथै, म्यानपावरबाट उल्लिखित कागजात फेइम्स् प्रणालीमा अपलोड गर्न अनुरोध गर्दै दूतावासमा इमेलसमेत प्राप्त हुने गरेको भन्दै त्यस्ता गिरोहको झुक्यानमा नपर्न र सतर्क रहन दूतावासले आग्रह गरेको छ ।
दूतावासले प्रमाणीकरण भएका कामदारका मागपत्रहरु प्रत्येक दिन भोलिपल्ट बिहानसम्ममा फेइम्स् प्रणालीमा अपलोड भइसक्ने जनाउँदै बिहीबार प्रमाणीकरण भएका मागपत्रहरू पनि त्यही दिन साँझसम्म अपलोड भइसक्ने जनाएको छ । साथै, यसरी प्राप्त नक्कली कागजातमाथि आवश्यक अनुसन्धान गरी कानुनी कारबाही गर्नका लागि सम्बन्धित निकायमा पठाइसकिएको दूतावासले जारी गरेको विज्ञप्तिमा उल्लेख छ । दूतावासबाट प्रमाणीकरण भएका कुनै मागपत्र सम्बन्धमा थप जानकारी चाहिएमा वा नक्कली कागजात, सरकारी छाप बनाउने तथा मानवतस्कर गर्ने गिरोहबारे कुनै जानकारी भएमा नेपाल सरकारको सम्बन्धित निकायमा वा ओमानमा रहेको दूतावासलाई जानकारी गराउन सरोकारवाला सबैलाई दूतावासले आग्रह गरेको छ ।
त्यस्तै दूतावासले हालै वैदेशिक रोजगारीको लागि ओमानमा रहेका नेपालीहरुलाई चेतना अभिवृद्धिका लागि ‘श्रमिक सचेतना’सम्बन्धी कार्यक्रमसमेत सञ्चालन गरेको छ । कार्यक्रममा विशेषगरी ओमानमा गर्न हुने र नहुने कार्यहरू, त्यहाँको श्रम कानुनको मूलभूत पक्षहरू, श्रम स्वीकृत लिएर विदेशमा काम गर्ने कामदारहरूले स्वदेशमा व्यवस्था गरिएको आरक्षित सेयरमा लगानी गर्ने तरिकाकोबारेमा जानकारी दिइएको थियो ।
यसैगरी औपचारिक तथा बैंकिङ माध्यमबाट नेपालमा रकम पठाउने तरिका, मानव तस्करीबाट बच्ने उपाय, पीडितहरूले न्यायका लागि उजुरी तथा कानुनी कारबाहीमा अपनाउनुपर्ने तरिका, नेपाल तथा ओमानमा सामाजिक सुरक्षामा आबद्ध हुने तरिकाको विषयमा पनि जानकारी दिइएको दूतावासले उल्लेख गरेको छ । यस्तै सामाजिक सञ्जालको प्रयोग र ओमानमा यससम्बन्धी कानुनी व्यवस्था, राहदानी तथा कन्सुलर सेवासम्बन्धी विषयहरूका बारेमा पनि कार्यक्रममा सहभागीहरुले जान्ने मौका पाएका थिए । उक्त कार्यक्रममा १४० जना कामदारले सक्रियतापूर्वक सहभागिता जनाएको दूतावासले जनाएको छ ।
प्रकाशित मिति: शुक्रबार, फागुन १९, २०७९ १२:३५
