काठमाडाैं - सहिद स्मारक ए डिभिजन लिग फुटबल प्रतियोगिताअन्तर्गत आज भएको खेलमा जावलाखेल युथ क्लब र त्रिभुवन आर्मी क्लब विजयी भएका छन् ।जावलाखेलले एनआरटीलाई तथा आर्मीले मच्छिन्द्र क्लबलाई पराजित गर्दै विजयी भएका हुन् ।
सातदोबाटोस्थित एन्फा कम्प्लेक्समा आज भएको खेलमा जावलाखेलले न्यूरोड टिम (एनआरटी)लाई २–१ गोलअन्तरले हराउँदै विजयी भएको हो । यससँगै जावलाखेलले प्रतियोगितामा लगातार दोस्रो जित दर्ता गरायो । यसअघि जावलाखेलले पहिलो खेलमा मच्छिन्द्र फुटबल क्लबलाई पराजित गरेको थियो ।
जाउलाखेलको जितमा कप्तान सीमान्त थापा र विदेशी खेलाडी फोडे फोफानाले समान एक–एक गोल गरे । यता एनआरटीका लागि भने सञ्जीव विष्टले एक गोल फर्काए । खेलको ६८औँ मिनेटमा सीमान्तले गोल गर्दै जावलाखेललाई सुरुआती अग्रता दिलाए ।
त्यसपछि खेलको ७७औँ मिनेटमा फोफानाले गोल गरेपछि जावलाखेलले २–० गोलअन्तरको अग्रता बनायो ।त्यस्तै खेलको ८०औँ मिनेटमा एनआरटीका सञ्जीवले गोल गरे पनि जावलाखेल २–१ ले विजयी भयो । जितसँगै जावलाखेलले दुई खेलमा छ अङ्क जोडेको छ ।
एनआरटीको भने यो लगातार दोस्रो हार हो । पहिलो खेलमा एनआरटी सातदोबाटो युथ क्लबसँग पराजित भएको थियो ।यसैगरी सातदोबाटोस्थित च्यासल खेलमैदानमा आजै भएको अर्को खेलमा त्रिभुवन आर्मी क्लबले मच्छिन्द्र फुटबल क्लबलाई पराजित गर्दै विजयी भएको छ । आर्मीले मच्छिन्द्रलाई २–० ले पराजित गरेको हो ।
आर्मीको जितमा दीपक गुरुङ र नवयुग श्रेष्ठले एक–एक गोल गरे ।खेलको ४८औँ मिनेटमा दीपकले हेडरमार्फत गोल गर्दै आर्मीलाई सुरुआती अग्रता दिलाए । त्यसपछि खेलको ५९औँ मिनेटमा नवयुगले पेनाल्टीमार्फत गोल गर्दै आर्मीलाई २–० को सहज जित दिलाए । यस जितसँगै आर्मीले दुई खेलमा चार अङ्क जोडेको छ । आर्मीले पहिलो खेलमा सङ्कटा क्लबसँग बराबरी खेलेको थियो ।
प्रकाशित मिति: बिहीबार, फागुन २५, २०७९ १९:१८
