मोहनप्रसाद पन्त
काठमाडौं– अब नेपालबाट रोजगार अनुमति प्रणाली (इपिएस)मार्फत प्रतिमहिना दुई हजारका दरले नेपाली श्रमिक दक्षिण कोरिया जान पाउने भएका छन् । कोरियाले नेपालबाट इपिएसमार्फत वार्षिकरुपमा निश्चित कोटा निर्धारण गरी श्रमिक लैजाने गरेकोमा उक्त प्रणाली हटाउँदै मासिकरुपमा दुई हजार श्रमिक लैजाने भएको छ ।
कोरियाले गत फेब्रुअरीबाट यसअघि लागू कोटा प्रणाली हटाउँदै इपिएसअन्तर्गत हुने परीक्षा पद्धतिमा सुधार र छिटोछरितो तवरले श्रमिक पठाउने मुलुकबाट धेरै श्रमिक लैजाने नीति अवलम्बन गरेको छ । कोरियाले नेपाललगायत १६ वटा मुलुकबाट इपिएसमार्फत श्रमिक लैजाने गरेको छ । नेपालले इपिएस भाषा परीक्षा पद्धतिमा गरेको सुधार र छिटोछरितो तवरले श्रमिक पठाउन खेलेको भूमिकाको मूल्यांकन गर्दै कोरियाले थप श्रमिक लैजान प्रतिबद्धता खोजेको वैदेशिक रोजगार विभागको इपिएस कोरिया शाखाका निर्देशक पुष्पराज कटुवालले बताए ।
‘वैदेशिक रोजगारीको आकर्षक गन्तव्य बनेको दक्षिण कोरियाले थप श्रमिक लैजान प्रतिबद्धता खोज्नु उपलब्धि नै हो,’ निर्देशक कटुवालले भने, ‘हामी मागअनुसारको श्रमिक उपलब्ध गराउन सक्षम छौं र कोरियालाई तयारीकासाथ पठाउन सक्छौं भन्ने प्रतिबद्धता जनाएका छौं ।’ सोहीअनुसार भाषा परीक्षा उत्तीर्ण गरेका युवाहरुलाई कोरिया पठाउने रोस्टर तयार पारिएको उनले बताए । मासिक दुई हजारका दरले नेपाली श्रमिकलाई कोरिया पठाउन लागिएको उनले जानकारी दिए । ‘इपिएस भाषा प्रणाली र श्रमिकको लगनशीलता तथा इमान्दारिताले नेपाली श्रमिकहरु कोरियाको रोजाइमा परेका छन्,’ कटुवालले भने । उनका अनुसार कोरियाले गत फेब्रुअरीबाटै दुई हजार श्रमिक लैजान थालिसकेको छ भने मार्च महिनाका लागि पनि उत्तिकै संख्यामा रोस्टर तयार भइसकेको छ ।
कोरियाले १६ वटै मुलुकका लागि समान नीति अवलम्बन गर्दै श्रमिकको माग पूर्तिमा सबैका लागि सबै कोटा अवधारणा सुरु गरेर नेपाललाई अवसर दिएको कटुवालले बताए । कोरियाले सबै मुलुकबाट वार्षिकरुपमा एक लाख १० हजार विदेशी श्रमिक लैजाने कोटा तय गरेको छ । ‘यसबाट जतिसक्यो धेरै नेपालले लाभ लिनसक्छ,’ कटुवालले भने, ‘हाम्रो क्षमता र तयारीअनुसार यस वर्ष (२०२३ मा) २० देखि २५ हजारको हाराहारीमा नेपाली युवाले कोरियामा रोजगारी पाउने छन् ।’
यसअघि २०२२ मा नेपालबाट १५ हजार युवा कोरिया गएका थिए । अब कोरियाले भनेअनुसार प्रतिमहिना दुई हजारका दरले पठाउन सकेमात्रै पनि २४ हजार नेपाली रोजगारीका लागि कोरिया पुग्ने देखिन्छ । हाल रोस्टरमा रहेका उत्पादनमूलक क्षेत्रमा जाने श्रमिकलाई कोरिया पठाइसकेपछि थप श्रमिकका लागि भाषा परीक्षा सञ्चालन गर्ने इपिएस कोरिया शाखाले जनाएको छ । भाषा परीक्षा उत्तीर्ण गरेका एक हजार ६०० मध्ये एक हजार २०० युवा कोरिया जाने प्रतीक्षामा छन् । साथै, कृषि क्षेत्रमा जाने श्रमिकहरुको भाषा परीक्षा चलिरहेको शाखाले उल्लेख गरेको छ ।
प्रकाशित मिति: मंगलबार, फागुन ३०, २०७९ १०:५१
