– मुख्यमन्त्री हिक्मतकुमार कार्कीपछि माओवादी नेता इन्द्रबहादुर आङ्बोमाथि आक्रमण प्रयास
– माओवादी मन्त्री दुर्गाप्रसाद चापागाईंलाई पनि धम्की
– प्रदेशका विशिष्ट व्यक्तिहरूको सुरक्षा जोखिम बढेको प्रहरीको विश्लेषण
काठमाडौं– मुलुकको पूर्वी क्षेत्रको प्रदेश (प्रदेश १)को नाम ‘कोशी’ राख्न मतदान गर्नेहरूलाई पहिचानवादी पक्षले भौतिक आक्रमणको निशानामा पार्न थालेका छन् । सोमबार मुख्यमन्त्री हिक्मतकुमार कार्की सवार गाडीमा तोडफोड गर्दै आक्रमण प्रयास गरेको भोलिपल्टै प्रदेशका नेकपा माओवादी केन्द्र संसदीय दलका नेता इन्द्रबहादुर आङ्बो सवार गाडीलाई पहिचानवादीहरूले आक्रमणको निशाना साँधे । उनलाई पहिचानवादीहरूले ‘गद्दार’ घोषणा गरिसकेका छन् ।
उनै आङ्बो मंगलबार ताप्लेजुङको सदरमुकाम फुंलिङ पुुग्दा आक्रमणको प्रयास भएको हो । सो क्रममा उनी सवार गाडीमा सामान्य क्षति पुुगेको जिल्ला प्रहरी कार्यालय ताप्लेजुङका प्रहरी नायव उपरीक्षक (डिएसपी) राजन लिम्बूले बताए ।
‘फुंलिङ बजारभन्दा सात–आठ किलोमिटर तल गाडीमाथि ढुंगा प्रहार भयो । आक्रमण गर्नेको पहिचान हुन बाँकी छ । हामी अनुसन्धानमै छौं,’ डिएसपी लिम्बूले प्रभावसँग भने ।
चार मंसिरमा निर्वाचन हुनुअघि नेता आङ्बोले ‘किरात’बाहेकका प्रदेशमा मत नदिने, बरु औंला काट्ने वाचा किरात धर्मगुुरु आत्म लिङ्देनलाई साक्षी राखेर भनेका थिए । त्यसबेला उनी ‘कोशी’ प्रदेश नाम राख्न नहुने पक्षमा उभिए ।
तर, १७ फागुनमा भने उनै आङ्बोले नाममा बाधक नबन्ने भन्दै ‘कोशी’ नामको पक्षमा मतदान नै गरे । धर्मगुुरुसामुु गरेको वाचाको विरुद्धमा उभिए । उनले २५ फागुनमा राष्ट्रपति निर्वाचनमा मतदानका लागि आउँदा प्रभावसँग भनेका थिए, ‘मैले औंला काट््नु त के हामीलाई निर्वाचनमा ढाड नै भाँचिदिए ।’
नेता आङ्बोमाथि आक्रमण प्रयास भएसँगै प्रहरीले सुरक्षा जोखिम बढेको देखिएको जनाएको छ । ‘नामले गर्दा पहिचानवादीहरू अत्यन्तै असन्तुुष्ट देखिए । ज–जसले कोशी नाममा मतदान गरे, उनीहरू पहिचानवादीहरूको निशानामा पर्दै जाने देखेको छु । सोमबार र मंगलबारको घटनाले त्यही भन्छ,’ एक जना सुरक्षा अधिकारीले भने ।
आक्रमण प्रयासपछि आङ्बोले भने आफूविरुद्ध पहिचानवादीहरूले धेरै अपेक्षा, विश्वास र भरोसा गरेको तर अपेक्षित परिणाम नआएपछि आक्रोश, घृणा र आवेग उत्पन्न भएको भन्दै त्यसलाई स्वाभाविक मान्ने बताएका छन् । उनले विरोध र असहमतिप्रति आफ्नो सम्मान हुने पनि बताए ।
उनले सामाजिक सञ्जाल फेसबुकमा आक्रमण प्रयासको केही घण्टामै लेखेका छन्, ‘जोसँग सबैभन्दा बढी अपेक्षा, विश्वास र भरोसा हुन्छ अपेक्षित परिणाम हासिल नहुँदा उसैप्रति आक्रोश, घृणा, आवेग व्यक्त हुनुलाई मैले स्वाभाविकरुपमा लिएको छु । हामीले ल्याएको यो लोकतान्त्रिक व्यवस्थामा शान्तिपूर्णरुपमा गरिने विरोध, असहमतिप्रति मेरो सधैँ सम्मान रहनेछ ।’
सोमबार मुख्यमन्त्री कार्की पहिचानवादीहरूको आक्रमणको निशानामा परेका थिए । ओखलढुुंगा जाँदा पहिचानवादीहरूले उनी सवार गाडी तोडफोडको प्रयास गरेका थिए । सो क्रममा प्रहरीले केहीलाई नियन्त्रणमा लिएको थियो । सुरक्षा जोखिम बढेपछि उनी ओखलढुुंगाको कार्यक्रम छोट्याएर प्रदेश राजधानी विराटनगर फर्किएका थिए ।
यसअघि धनकुुटाका एमाले सांसद निरन राईलाई राई जातिको सामाजिक संस्था किरात राई यायोख्खाले ‘वंश गद्दार’ घोषणा गरिसकेको छ । निरन ती नेता हुुन्, जसले १७ फागुनमा रामबहादुर राना प्रस्तावक रहेको ‘कोशी’ प्रदेश नामाकरणसम्बन्धी प्रस्तावमा समर्थक थिए । जुन नामलाई पहिचानवादीहरूको अस्वीकार छ । प्रदेशको नाम ‘कोशी’ खारेज गर्न माग छ । फेरि, नामांकन गर्नुपर्नेमा पहिचानवादीहरूको जोड छ । उनीहरूका अनुसार प्रदेशको नाम ऐतिहासिक पृष्ठभूमिका आधारमा राखिनुुपर्छ । तर, लिम्बूवान–किरात नाम राख्न मुख्यमन्त्री कार्कीसँगै प्रदेश संसद्को दुुई तिहाइभन्दा बढी सांसदहरू तयार छैनन् ।
कार्कीले आइतबार मात्रै खारेज गर्न नसकिने बताएका थिए । त्यसपछि पहिचानवादीहरू झनै आक्रोशित भए । उनीविरुद्ध सामाजिक सञ्जालमा पहिचानवादीहरूले सुरक्षा जोखिम बढ्नेगरी चेतावनी दिएका छन् । यससँगै कोशी प्रदेश प्रहरी कार्यालयले मुख्यमन्त्री कार्कीसँगै कोशी नाममा मतदान गर्ने सांसदहरूको सुरक्षामा थप ध्यान दिएको जनाएको छ ।
माओवादीकै प्रदेशमन्त्री दुुर्गाप्रसाद चापागाईंलाई पनि पहिचानवादीहरूले निशानामा पार्ने चेतावनी दिएका छन् । १७ फागुनमा प्रदेश नाम कोशीमा मतदान गरेपछि पहिचानवादीहरू आक्रामक भएका छन् । उनीहरूले आइतबार प्रदेश राजधानी विराटनर र संघीय राजधानी काठमाडौंमा एकैसाथ प्रदेशको नाम कोशी खारेजीको माग गर्दै प्रदर्शन गरेका थिए ।
कोशी नाम राख्न एमालेका ४० जना, कांग्रेसका २९ जना, माओवादीका १३ जनासँगै राप्रपाका छ जना सांसदले मतदान गरेका थिए । प्रदेश संसद्मा नामसम्बन्धी प्रस्ताव पारित गर्न ९३ जना सांसदको दुुईतिहाइ पुुग्न कम्तीमा ६२ जना सांसद आवश्यक पथ्र्यो । तर, यी चार दलको ८७ जना सांसदले मतदान गरेका थिए । जतिबेला मोरङ जिल्ला प्रशासनले निषेधाज्ञा जारी गरेको थियो । पहिचानवादीहरूले प्रदर्शन पनि गरे । यद्यपि, प्रदेश संसद्को आवश्यकताभन्दा बढी अधिक सांसदले प्रस्तावमा मतदान गर्दै नामसम्बन्धी प्रस्ताव पारित गरेका हुन् ।
प्रधानमन्त्री दाहालविरुद्ध नारावाजी
काठमाडौं (प्रस)– प्रदेश नामलाई लिएर कोशीमा मुख्यमन्त्रीदेखि अन्य नेताहरूलाई पहिचानवादीहरूले आक्रमणको प्रयास गर्दा संघीय राजधानीमा प्रधानमन्त्री पुुष्पकमल दाहालविरुद्ध नारावाजी भएको छ । तीन जना युवाले नयाँ बानेश्वरमा ‘गरिबमारा प्रचण्ड मुर्दावाद,’ ‘मूख्यवृद्धि खारेज गर’, ‘नालायक सरकार होसियार’, ‘युवालाई मार्न पाइँदैन’, ‘यस्तो सरकार चाहिँदैन’, ‘७७ जिल्लाका युवा एक हौं’ भन्दै नारावाजी गरेका हुन् ।
उनीहरूले ५८औं अन्तर्राष्ट्रिय जातीय भेदभाव उन्मूलन सार्वजनिक समारोहमा जाँदै गर्दा दाहालविरुद्ध नारावाजी गरेका थिए । नारावाजी गर्ने तीनै जना पक्राउ परेका छन् । त्यसपछिमात्रै दाहाल कार्यक्रममा गएका थिए । उनले कार्यक्रममा दलित समुदायका लागि सयौं वर्ष सम्झिन मिल्ने केही घोषणा गर्न लागिएको बताएका थिए ।
प्रकाशित मिति: बुधबार, चैत ८, २०७९ ११:३२
