काठमाडौं– गीतकार दर्पण राईको चर्चित गीत ‘तिमीले बाटो फेर्यौ अरे–२’ करोड क्लवमा प्रवेश गरेको छ । आफ्नो गीतले करोड भ्युअर्स पाएपछि गीतकार दर्पण दंग भएका छन् ।
मोडलसमेत रहेका गीतकार दर्पणको यो ‘सिग्नेचर’ गीत हो । उनले करिब दर्जनको संख्यामा गीत लेखेका छन् । तर, तीमध्ये दर्पणलाई चिनाउने गीत ‘तिमीले बाटो फेर्यौ’ नै हो । जुन गीतले उनकै यु–ट्युब च्यानलमा एक करोड भ्युअर्स पाएको छ ।
त्यसो त ‘तिमीले बाटो फेरयौ अरे’ पनि करोड भ्युअर्स पाउने आधुनिक गीत हो । नेपालमा फिल्मका गीतहरूले मात्र करोड भ्यअुर्स पाएको समाचार आइरहेका बेला दर्पणको ‘तिमीले बाटो फेरयौ अरे’ले आधुनिक गीततर्फ करोड भ्युअर्स पाएर रेकर्ड राख्न सफल भएको थियो । त्यसपछि गीतिकारितामा हौसिएका दर्पणले उक्त गीत विभिन्न भर्सनमा रेकर्ड गराए ।
पहिलोपटक मेल भर्सनमा ‘तिमीले बाटो फेरयौ अरे’ राई इज किङ गायक राजेशपायल राईको स्वर रेकर्ड गराएका थिए भने उक्त गीतलाई फिमेल भर्सनमा गायिका मेलिना राईले गाइन् । एक किसिमले भन्ने हो भने मेलिनालाई समेत उक्त गीतले चर्चामा ल्याएको हो । अहिले पनि अधिकांश कार्यक्रममा मेलिनाले ‘तिमीले बाटो फेरयौ अरे’ गाउँदै आएकी छन् ।
पछिल्लो समय गायिका मेलिनाकै स्वर रहेको ‘तिमीले बाटो फेरयौ अरे–२’ करोड क्वलबमा प्रवेश गरेको हो । विक्रम राईको संगीत रहेको उक्त गीतको भिडियोमा मेलिना र दर्पण नै फिचरिङ छन् । यो गीतको भिडियोलाई फरक ढंगले निर्माण गरिएको छ । एउटा गीतकारकै क्रियशनलाई ‘तिमीले बाटो फेरयौ अरे–२’को भिडियोमा साधारण तवरले उतारिएको छ ।
गीतकार दर्पणका यीबाहेक ‘यो मुटु दुख्छ किन’, ‘तिमीलाई मन पराउनु मेरो गल्ती होइन’, ‘मायामा जाल भो’, ‘नजिकिनु सजिलो थियो’जस्ता चर्चित गीतहरू छन् । तर, ‘तिमीले बाटो फेरयौ अरे’को अगाडि ती सबै फिका भएका छन् ।
