काठमाडौं- राष्ट्रिय विभूति एवं पहिलो नेपाली महिला सगरमाथा आरोही पासाङल्हामु शेर्पाको जीवनीमा आधारित रहेर निर्माण गरिएको फिल्म ‘पासाङः इन द स्याडो अफ एभरेष्ट’ यही वैशाख १० गतेदेखि हलमा प्रदर्शनी हुने भएको छ ।
उक्त फिल्मको आज ‘प्रिमियर सो’ सँगै आयोजित पत्रकार सम्मेलनमा देशभरका क्युएफएक्स हलमा फिल्म प्रदर्शन हुने पासाङल्हामु फाउन्डेशनले जानकारी दिएको छ ।
सगरमाथा आरोही पासाङल्हामु शेर्पाको यथार्थतामा आधारित रहेर अमेरिकी निर्देशक न्यान्सी स्वेन्डसेनले दुई दशक बढी समय मेहनत गरेर फिल्म तयार पारेको फाउन्डेशनका अध्यक्ष दावा फुटी शेर्पाले जानकारी दिए। बहत्तर मिनेट फिचर रहेको फिल्मको निर्माता शेरोन वुड र आङ दोर्जे शेर्पा रहेका छन् ।
सन् २०२२ मार्चमा सान्ता बाबा अन्तर्राष्ट्रिय चलचित्र महोत्सवमा प्रिमियरमा रिलिज भएको यस फिल्म ३०औँ पासाङल्हामु दिवसको अवसर पारेर देशभर प्रदर्शन गर्न लागिएको फाउन्डेशनले जनाएको छ । फाउन्डेशनले सिभिलमलको हलमा प्रतिनिधिसभाका सभामुख देवराज घिमिरेलगायत उच्च व्यक्तित्वको उपस्थितिमा नेपालमा पहिलो पटक फिल्मको प्रिमियर गरेको छ ।
सो अवसरमा सभामुख घिमिरेले नेपाली साहसिक प्रथम महिला सगरमाथा आरोही पासाङल्हामु शेर्पाको जीवन सङ्घर्ष र सफलताको उचाइलाई नजिकबाट नियाल्न र समाजमा प्रेरणा जगाएन फिल्म उपयोगी हुने विश्वास व्यक्त गरेका छन् ।
उनले भने, “फिल्ममार्फत नेपालीले नेपालमा गरिरहेका सङ्घर्ष, तत्कालीन (३० वर्षअघिको) समाजमा महिलाले गरेको सङ्घर्ष र उपलब्धिले सबैलाई प्रेरणा दिएको छ । पासाङल्हामुले जीवन गुमाए पनि महिलामा साहसिक सन्देश दिएर नेपालको पहिचानलाई विश्वभर फैलाउनुभएको छ ।”
फिल्मले पासाङ ल्हामु शेर्पाको दुःखद् र प्रेरणादायी यात्राको वर्णन गर्दछ । नेपाली समाजमा दुर्गमका एक अशिक्षित, आदिवासी महिलाले अघि बढ्न गरेको सङ्घर्ष, यसको अवरोध र समाजदेखि परिवारसम्मको सहयोगलगायतका विषय जोडेर समाजलाई रूपान्तरणको सन्देश फिल्मले दिएको छ ।
पटकपटक सगरमाथा आरोहणको दृढ प्रयास गर्नु र बाधा अवरोधलाई जितेर सफलता प्राप्त गर्नु नै फिल्मको मुख्य सन्देश बनेको छ । यो फिल्म अन्तर्राष्ट्रिय क्षेत्रमा भएका ३० वटा फिल्म फेस्टिभलमा प्रदर्शन भइसकेको छ । टेलुराइड, कोलोराडो, बान्फ, क्यानडा र बेलायतको केन्डल माउन्टेन फेस्टिभल र अन्य प्रतिष्ठित फेस्टिभलसहित १४ वटा पुरस्कारसमेत जितिसकेको छ ।
पासाङल्हामु जस्ता साहसी महिलाबाट सपना बुन्नसक्ने, सफलता प्राप्त गर्न बाधा सामना गर्न सक्नु नै महिलाको एउटा उदाहरणीय साहस फिल्ममा देखाइएको छ । विद्यार्थी, अभिभावक र ज्येष्ठ नागरिकसम्म जनचेतना पुग्ने लक्ष्यले फिल्म प्रदर्शन क्युएफएक्समा मात्र नभएर लुक्ला, नाम्चेलगायतका सातै प्रदेशका मुख्यमुख्य सहरमा प्रदर्शन गर्ने फाउन्डेशनले जनाएको छ ।
प्रकाशित मिति: बिहीबार, वैशाख ७, २०८० १०:३२
