काठमाडौं– आइसिसी विश्वकप क्रिकेट लिग–२ अन्र्तगतको आप्mनो तेस्रो खेलमा नेपाल ओमानसँग पराजित भएको छ । आइतबार घरेलु मैदान कीर्तिपुरमा खेलेको जारी लिगमा ओमानसँगको दोस्रो खेलमा नेपाल ८ विकेटले पराजित भएको हो । यस हारसँगै नेपाल सन् २०१३ देखि ओमानविरुद्ध जित हासिल गर्न सफल भएको छैन ।
कीर्तिपुरस्थित त्रिवि क्रिकेट मैदानमा ओमानले टस जितेर फिल्डिङ रोजेपछि नेपाल ब्याटिङमा उत्रेको थियो । नेपालले ओमानसामु जितका लागि २५० रनको लक्ष्य प्रस्तुत गरेको थियो । नेपालले ५० ओभर पूरै खेल्दै आठ विकेटको क्षतिमा २४९ रन बनाएको थियो । दुई सय ५० रनको विजय लक्ष्य ओमानले ४७ दशमलव दुई ओभरमा मात्र दुई विकेट गुमाएर पूरा गर्याे ।
ओमानका लागि अकिब इलियासले शतकीय पारी खेल्दै १०८ बलमा अविजित १०९ रन बनाए । पच्चीस दशमलव पाँच ओभरमा आरिफ शेखले अकिबको क्याच छोड्नु नै नेपालका लागि घातक सावित भयो । यस्तै जेशन मक्सुदले अविजित ६८ रनको योगदान दिए । यसैगरी खवर अलीले ४१ तथा जितिन्दर सिंहले २३ रन बनाए । बलिङतर्फ नेपालका कुशल मल्ल र सुशन भारीले एक एक विकेट लिए ।
यसअघि नेपालका लागि ब्याटिङ गर्ने क्रममा कप्तान ज्ञानेन्द्र मल्ल र सुवास खकुरेलले ४८ रनको साझेदारी गरे । अमेरिकासितको खेलमा तीन रनमा आउट भएका खकुरेलले आइतबारको खेलमा २२ रन बनाए भने कप्तान ज्ञानेन्द्र मल्लले ७६ बलमा ५६ रनको अर्धशतकीय पारी खेल । त्यस्तै पूर्वकप्तान पारस खड्काले ३४ बलमा विस्फोटक ३८ रन बनाउँदै आउट भएका थिए ।
यस्तै विनोद भण्डारीले पाँच चौकाको मद्दतमा ३५ रन बनाए । उनी व्यक्तिगत ३५ रन बनाउँदा रन आउट भए । शनिबार अमेरिकासितको खेलमा विश्व कीर्तिमान बनाएका कुशल मल्लले दुई छक्का र दुई चौका प्रहार गर्दै २८ रनको योगदान गरे । आरिफ शेखले २८ रन तथा करन केसीले १० रन बनाए । सन्दिप लामिछानेले अविजित १० तथा डेब्यु म्यान कमलसिंह ऐरीले अविजित नौ रन बनाए ।
बलिङतर्फ ओमानका अकिब इलियासले चार तथा मोहमद नदिमले तीन विकेट लिए । शतकीय पारीका साथै चार विकेटसमेत लिएका ओमानका अकिब प्लेयर अफ दी म्याच घोषित भए ।
ओमान जितसँगै लिगको शीर्ष स्थानमा उक्लेको छ । हालसम्म खेलेको नौ खेलमध्ये सातमा जित तथा दुईमा हारका साथ ओमानले १४ अङ्क बटुलेको छ । अमेरिका १२ अङ्कसहित लिगको दोस्रो स्थानमा झरेको छ । नेपालले भने हालसम्म खेलेको तीन खेलमा दुईमा हार तथा एकमा जित निकाल्दै दुई अङ्क जोडेको छ । नेपाल लिगको छैटौँ स्थानमा छ । अब नेपालले अन्तिम खेल बुधबार अमेरिकासित खेल्नेछ । आइसिसी विश्वकप क्रिकेट लिग दुईमा नेपालसहित, अमेरिका, ओमान, स्कटल्याण्ड, नामिविया, युनाइटेड अरब इमिरेट्स (युएई) र पपुवा न्युगिनी रहेका छन् ।
