उपनिर्वाचन कांग्रेसका लागि प्रतिष्ठाको लडाइँ थियो । कांग्रेसको लगानीमा हुर्के बढेका डा. स्वर्णिम वाग्लेले घर छाडेर छिमेकीको बार्दली चढ्दै गर्दा कांग्रेस लाज जोगाउन उत्रेको थियो । कांग्रेसले उम्मेदवार मनोनयनको दिन तनहुँ–२ मा महामन्त्री गगन थापालाई खटायो भने चितवन–२ मा अर्का महामन्त्री विश्वप्रकाश शर्मालाई ।
कांग्रेसका महामन्त्रीद्वय गगन र विश्वप्रकाश नेतृत्वको आलोचना गर्दै हुर्केका जोधाहा नेताहरु हुन् । कांग्रेसमा शेरबहादुर देउवाको निरंकुश शैलीको चर्को विरोध गरेकै कारण युवाले मनपराएर महामन्त्रीसम्मको यात्रा तय गर्ने दुवै महामन्त्री यसपटक उपचुनावमा खटिए ।
जब सडकमा हुन्छ, प्रश्न स्वाभाविक हो । तब कुर्सीमा पुग्छ, उसले जवाफ दिनैपर्छ । जवाफ सन्की भएर हैन सुझबुझपूर्ण आउनुपर्छ । हालै नेतृत्वमा पुगेर चुनावबाट पनि अनुमोदन भएर आएको गगन र विश्वप्रकाश जब चुनावीसभामा उत्रिए– बोल्दै जाँदा दुवै जनामा सत्ताको उन्माद चढ्यो । अनि त्यही टिकट नपाएर पार्टी छाड्न बाध्य भएका डा. स्वर्णिममाथि कुर्लिए । गगन दमौलीमा छाती ठोक्दै स्वर्णिमलाई धारे हात लगाउँदै गर्दा भरतपुरमा विश्वप्रकाशले सोध्न भ्याए– शेरबहादुर देउवाले नै राष्ट्रिय योजना आयोगका उपाध्यक्ष बनाएको हो, गीत गाउन दिँदा नाच्छु भन्दै आउने ?
कांग्रेसले आफ्नो आँगनमा नाच्न नदिएपछि स्वर्णिम छिमेकीको आँगनमा नाच्न निस्के । नाच्नमा उनी पोख्त रहेछन् भन्ने कुरा जनताबाट अनुमोदित भएपछि प्रस्टिसकेको छ । तर, नाच कांग्रेसका ‘डान्स कोरियोग्राफर’हरु भने आँगन टेढो भएको हो कि भन्दै आफ्ना उम्मेदवारहरुतिर वाल्ल परेर हेरिरहेका होलान् । देउवा नेतृत्वमा लगभग कमजोर बनेको छ, कांग्रेस । नेता कार्यकर्ताले गठबन्धन मन पराएका छैनन् । यद्यपि, देउवाले माओवादीलाई काँध हालेर हिँडेको छ । यस्तो अवस्थामा खुंखार आलोचक भन्ने गगन र विश्वप्रकाश यो उपनिर्वाचनमा देउवाको कवच त बने नै खटिएको ठाउँबाट लोकप्रिय मत पनि जुटाउन सकेनन् ।
मंसिरको निर्वाचनमा गगन र विश्वप्रकाश अरु उम्मेदवारको क्षेत्रमा मत माग्न गएनन् भन्ने आरोप लागेको थियो । अहिले ती नेता गम खाँदै होलान्– मेरो क्षेत्रमा नआएर ठीकै गरेछन् । चितवन र तनहुँमा गठबन्धन दिलोज्यान दिएर लागेकै थियो । दुई महामन्त्री टाउको टेकेर छाती ठोकेर लागेकै थिए । तर नतिजा– हातमा लाग्यो शून्य । प्रयोग भएर वा गरेर दुई महामन्त्री उपनिर्वाचनमा असफल भए । चुनावको परिणाम आइसक्यो आत्मसमीक्षा गर्दै आत्मालोचना गर्ने कहिले ?
प्रकाशित मिति: बुधबार, वैशाख १३, २०८० १०:५३
