काठमाडौं — सहिद स्मारक ‘ए’ डिभिजन लिग फुटबलको मंगलबार सम्पन्न तीन खेलमा मनाङ मस्र्याङ्दी, थ्रीस्टार क्लब र त्रिभुवन आर्मी क्लब विजयी भएका छन् । मंगलबार सातदोबाटोस्थित एन्फा कम्प्लेक्समा सम्पन्न पहिलो खेलमा ब्रिगेड ब्वाइज क्लबलाई ३–० ले पराजित गर्दै आर्मीले जित हात पारेको हो । मंगलबारको जितसँगै आर्मी १२ खेलमा २८ अंकसहित लिगको शीर्षस्थानमा रहेको छ । त्यस्तै दोस्रो खेलमा एनआरटीलाई १–० ले पराजित गर्दै थ्रीस्टार लिगको चौथो स्थानमा रहेको छ भने नेपाल पुलिस क्बललाई २–० ले पराजित गर्दै मनाङ मस्र्याङ्दी क्लब लिगको तेस्रो स्थानमा रहेको छ ।
ललितपुरको सातदोबाटोमा मंगलबार १० खेलाडीमा सिमित विभागीय टिम नेपाल पुलिस क्लबलाई २–० गोल अन्तरको जितमा मनाङका विमल राना र अन्जन बिष्टले एक÷एक गोल गरे ।
मनाङले दुवै गोल पहिलो हाफमा गरेको थियो । खेलको ३२ औं मिनेटमा विमलले गोल गर्दै मनाङलाई १–० को अग्रता दिलाएका थिए । आदित्य चौधरीको पासमा विमलले सुरुवाती गोल गरे ।
त्यसपछि खेलको ४३ औं मिनेटमा अन्जनले गोल गर्दै मनाङलाई २–० को जित दिलाए । निशान लिम्बुले मिलाएको पासमा अन्जनले उत्कृष्ट गोल गरेका थिए । खेलमा मनाङका गोलकिपर दिप कार्की म्यान अफ दि म्याच चुनिए । पुलिसलाई हराएसँगै मनाङले शीर्ष दुई टोलीसँगको अंक दुरी समेत घटाएको छ । मनाङले १२ खेलमा २५ अंक जोडेको छ । मनाङ शीर्ष स्थानको आर्मी भन्दा ४ र दोस्रो स्थानको मछिन्द्र भन्दा एक अंकले पछि रहेको छ । मनाङको उपाधि होडबाट भने बाहिरीसकेको छ । पराजित पुलिस भने १७ अंक जोडेर छैटौं स्थानमा रहेको छ ।
त्यस्तै दोस्रो खेलमा दिपेश घलेको गोलमा न्युरोड टिम एनआरटीलाई १–० गोल अन्तरले पराजित ग¥यो । पहिलो हाफ गोलरहित बराबरीमा सकिएको खेलको दोस्रो हाफको ७७ औं मिनेटमा दिपेशले गोल गरेका हुन् । सुशील राईको स्थानमा मैदान छिरेका दिपेशले मैदान पसेको चार मिनेट नबित्दै डिबक्स बाहिर प्राप्त बललाई पोस्टको जाली चुमाएका थिए । खेलमा थ्री स्टारका गोलकिपर प्रिसो म्यान अफ दि म्याच चुनिए । त्यस्तै मंगलबार सम्पन्न पहिलो खेलमा ब्रिगेड ब्वाईज क्लबलाई ३–० गोल अन्तरले पराजित गर्दै आर्मी शीर्ष स्थानमा उक्लिएको हो । आर्मीको जितमा कप्तान भरत खवास, विकास तामाङ र टेक बहादुर बुढाथोकीले एक एक गोल गरे । खेलको पाँचौं मिनेटमा कप्तान भरतले गोल गर्दै आर्मीलाई सुरुवाती अग्रता दिलाएका थिए । भरतले जर्ज प्रिन्स कार्कीको क्रसमा हेड गोल गरेका थिए ।
यस गोलसँगै नेपाली राष्ट्रिय टोलीका फरवार्ड समेत रहेका भरतले नेपाली फुटबलकै माथिल्लो श्रेणीको ’ए’ डिभिजन लिगमा ५० गोल पुरा गरेका छन् । ’ए’ डिभिजन लिगमा ५० गोल पुरा गर्ने भरत सातौं खेलाडी हुन् । भरतले बिसं २०६३ सालमा संकटा क्लबबाट शीर्ष डिभिजन लिगमा डेब्यु गोल गरेका थिए । यस अघि लिगमा बसन्त थापा, रमेश बुढाथोकी, सुरेन्द्र तामाङ, सन्तोष साहुखल, गणेश लावती र अनिल गुरुङले ५० गोल गरिसकेका छन् । लिगमा १०० गोल पुरा गर्ने कीर्तिमान भने च्यासलका सन्तोष शाहुखलको नाममा रहेको छ ।
खेलको ५४ औं मिनेटमा विकास तामाङले गोल गर्दै आर्मीको अग्रता २–० को बनाए । उनले सन्तोष तामाङको पासलाई सदुपयोग गरे । त्यसपछि खेलको ७० औं मिनेटमा टेकले गोल गर्दै आर्मीलाई ३–० को जित दिलाए । उनले ब्रिगेडका किपर विशाल सुनारले पन्च गर्दै फ्यालेको रिबाउन्ड बलमा गोल गरेका थिए ।
जितसँगै आर्मीले उपाधि होड बलियो बनाएको छ । र, शीर्ष स्थानमा १ अंकको अग्रता बनाएको छ । आर्मीले १२ खेलमा २९ अंक जोडेको छ । दोस्रो स्थानको मच्छिन्द्रको २८ अंक रहेको छ । पराजित ब्रिगेड ८ अंक जोडेर १२ औं स्थानमा रहेको छ ।
आर्मीको जितसँगै लिगको उपाधिको छिनोफानो अन्तिम खेलले तय हुने भएको छ । लिगको अन्तिम चरणको अन्तिम खेलमा आर्मी र मछिन्द्रबीच प्रतिस्पर्धा हुनेछ । आर्मी र मछिन्द्रबीचको खेल त्रिपुरेश्वरस्थित दशरथ रंगशालामा फागुन ३ गते हुनेछ । आर्मीलाई उपाधि जित्न बराबरीले पुग्नेछ भने मछिन्द्रलाई स्पष्ट जितको आवश्यकता रहेको छ ।
प्रकाशित मिति: बुधबार, माघ २९, २०७६ ०६:४४
