- नीति तथा कार्यक्रम पुनर्लेखन गर्न माग
- सरकार ढाल्ने चेतावनी
- आफ्नै सरकारको काम स्मरण
- प्रधानमन्त्रीप्रति चुनौती, चेतावनी र आक्रोश
- टोपबहादुरलाई फसाउन खोजेको भन्दै असन्तुष्टि
काठमाडौं– सरकारको नीति तथा कार्यक्रमलाई ‘उद्देश्य, गन्तव्य र मार्गचित्रविहीन’ भनेका नेकपा एमालेका अध्यक्ष केपी शर्मा ओली आइतबार संसद्मा सरकारविरुद्ध करिब दुई घण्टा कड्किए । हाँस्यपरक ढंगले विपक्षीमाथि तीखो प्रहार गर्ने खुबी भएका ओली संसद्मा कड्किने पूर्वानुमान नै थियो । किनभने उनले शनिबार भनिसकेका थिए, ‘नीति तथा कार्यक्रम पारित हुन दिन्नौं । त्यसको सशक्त प्रतिवाद गर्छौं ।’
ओली शुक्रबार नै संसद् बैठकमा आउने भन्ने चर्चा पनि थियो । तर, आएनन् । बिरामी भएका कारण आउन नपाइएको भन्दै ओलीले आइतबार भने संसद्मा प्रधानमन्त्री पुष्पकमल दाहाललक्षित चुनौती, चेतावनी र आक्रोशको वर्षा गरे । डायरीका पानामा ल्याएका टिपोट हेर्दै ओलीले चेतावनी दिँदै भने, ‘नीति तथा कार्यक्रम पुनर्लेखन गरेर ल्याउनुभएन भने छक्का हानेर रिङआउट गरिदिन्छौं ।’
यो दाहाल नेतृत्वको सरकार ढाल्ने चेतावनीयुक्त अभिव्यक्ति हो । उसो त नीति तथा कार्यक्रम यदि दुवै संसद्बाट बहुमतले पारित नभए दाहाल सरकार संकटमा फस्नेछ । तर, संसद्बाट नीति तथा कार्यक्रम पारित नहुने सम्भावना छैन । सत्तारूढ दलहरूसँग स्पष्ट बहुमत छ । त्यही भएर प्रधानमन्त्री दाहाल ओलीले छक्का हानेर रिङआउट गर्ने अभिव्यक्ति दिँदा हाँसिरहेका देखिए ।
सम्बोधनकै क्रममा ओलीले २९ असार २०७८ अघिसम्म आफू नेतृत्वको सरकारले गरेको कामको फेहरिस्त रवाफिलो पारामा सुनाउन भ्याए । प्रधानमन्त्री भएका बेला हरेक दिन पाँच-छ किलोमिटर कालोपत्रे सडक बन्ने गरेको दाबी गर्दै उनले प्रधानमन्त्री दाहाललाई एक आर्थिक वर्षमा १० किलोमिटरमात्रै कालोपत्रे सडक निर्माण गर्ने ? प्रश्न गरे ।
आफ्ना सरकारले लिएको नीति र लक्ष्य दाहाल सरकारले नसमेटेको भन्दै ओली आक्रोशित पनि भए । उनी यतिमै रोकिएनन् । धरहराको प्रसंग निकाल्दै सरकारको चर्कै आलोचना गरे । ‘धरहरा शानदाररुपमा उभिएको छ तर अहिले अलपत्र पारिएको छ । देशलाई ठूलो घाटा पारिएको छ,’ ओलीले भने, ‘यो इतिहासँग पनि तपाईंहरूलाई शत्रूता किन भएको ? अचम्म लाग्छ ।’
२९ असार २०७८ अघिसम्म ओली प्रधानमन्त्री थिए । त्यसबेला अत्यन्तै तीव्रगतिमा देशको विकास र समृद्धि भएको दाबी गर्दै ओलीले आइतबार संसद्मा अहिलेको नीति तथा कार्यक्रमले भने एक वर्ष समयमात्रै त्यसै खेर जाने भएको टिप्पणी गरे ।
‘पूर्व–पश्चिम राजमार्गलाई चारदेखि छ लेनसम्म विस्तार गर्न प्रारम्भ ग¥यौं । मध्यपहाडी पुष्पलाल मार्ग, मदन भण्डारी राजमार्ग, कोशी, गण्डकी, कर्णाली राजमार्गको निर्माण कार्य पाँच वर्षमा सपन्न गर्ने गरी तीव्र गतिमा अगाडि बढाएका थियौं । अहिले केही छैन । त्यसै यो वर्ष खेर जाने भयो,’ ओलीले भने ।
ओलीले लामो सम्बोधन गर्दा केही सांसद भने हाइ काढिरहेका थिए । केही चाहिँ कानेखुसी गरिरहेका देखिन्थे । तैपनि आफू नेतृत्वको तत्कालीन सरकारले ल्याएका केही कार्यक्रम हालै सार्वजनिक नीति तथा कार्यक्रममा नसमेटिएको भन्दै गुनासो व्यक्त गरिरहेका थिए । उनले भने, ‘पूर्व–पश्चिम विद्युतीय रेलमार्गका कतिपय खण्डका डिपिआर तयार गरी निर्माण प्रारम्भ गर्दै थियौं । काठमाडौं, वीरगञ्ज र रसुवागढी–काठमाडौं–लुम्बिनी रेलमार्ग निर्माणको तयारी हुँदै थियो । कता हराए यी कार्यक्रम ?’
सम्बोधनका क्रममा ओलीले १८ घण्टा लामो लोडसेडिङको अन्त्य आफूले गरेको दाबी गरे । जबकि, दोस्रोपटक प्रधानमन्त्री हुँदा दाहालले ऊर्जामन्त्रीमा जनार्दन शर्मा र उनीमार्फत नेपाल विद्युत् प्राधिकरणका कार्यकारी निर्देशक कुलमान घिसिङलाई नियुक्त गराएर उज्यालो अभियानअन्तर्गत लोडसेडिङ अन्त्य गरेका थिए । तर, आइतबार संसद्मा भने गलत तथ्य प्रस्तुत गर्दै ओलीले आफूले लोडसेडिङको अन्त्य गरेको भन्दै जस लिने प्रयास गरे ।
‘३३३ मेगावाट थप विद्युत् उत्पादन गरी वितरणमा ल्यायौं । ४५६ मेगावाट थप विद्युत् उत्पादन गरी वितरणको तयारीमा पु¥यायौं,’ ओलीको भनाइ थियो, ‘विद्युत् तार भूमिगत गर्न सुरु ग¥यौं । लोडसेडिङ अन्त्य गरायौं ।’
राष्ट्रपति रामचन्द्र पौडेलले शुक्रबार संसद्मा सरकारको नीति तथा कार्यक्रम प्रस्तुत गरेका हुन् । जसबारे छलफल प्रारम्भ भएकै दिन प्रमुख विपक्षी दल एमालेका अध्यक्ष ओलीले लामो सम्बोधन गर्दै यथास्थितिमै नीति तथा कार्यक्रम पारित गर्न नहुने राय पनि प्रकट गरे ।
यसबाहेक ओलीले नेपाली नागरिकलाई भुटानी शरणार्थी बनाएर अमेरिका पठाउने भन्दै उच्च पदस्थ अधिकारीहरूकै संलग्नतामा भएको करोडौं करोडको ठगी प्रकरणमा पार्टी सचिव टोपबहादुर रायमाझीलाई निर्दोष करार गर्ने प्रयास गरे । उनले रायमाझीलाई फसाउन खोजिएको समेत घुमाउरो शैलीमा बताए ।
‘यो प्रकरणका दोषी कोही पनि छुट्नुहुँदैन । तर, अहिले निर्दोष फसाउने प्रयास भइरहेको छ । यसमा मेरो खबरदारी छ । अहिले दोषीलाई उम्काउने र निर्दोषलाई फसाउने प्रयास नगर्दा हुन्छ,’ उनले भने । शरणार्थीका नाममा भएको ठगी प्रकरण भयावह हुने उनको भनाइ छ । उनका अनुसार जसरी आगो छोप्दा पनि धुवाँ छोप्न सकिँदैन, शरणार्थी प्रकरण त्यस्तै हो ।
