काठमाडौं – सहिद स्मारक ‘ए’ डिभिजन लिग फुटबलको बिहीबार सम्पन्न खेलमा नेपाल पुलिस क्लब र संकटा क्लबले जित हात पारेका छन् भने विभागीय टोली सशस्त्र प्रहरीको एपीएफ र ब्रिगेड ब्वाइज क्लब बराबरीमा रोकिएका छन् ।
सातदोबाटोस्थित एन्फा कम्प्लेक्सको मैदानमा बिहीबारको पहिलो खेल र लिगमा आफ्नो अन्तिम खेल खेलेको नेपाल प्रहरीले जुमानु राईको ह्याट्रिकसाथ फ्रेन्डस् क्लबलाई ३–० ले पराजित गरेको थियो भने दोस्रो खेलमा एपीएफ क्लब र बिग्रेड ब्वाइज क्लबबीचको खेल १–१ को बराबरीमा टुगिंएको थियो ।
त्यस्तै बिहीबारको अनि लिगको आफ्नो अन्तिम खेलमा संकटा क्लबले रेलिगेशनमा परेको टिम सरस्वती युथ क्लबविरुद्ध ६–२ गोल अन्तरको फराकिलो जित हात पारेको थियो ।
संकटाको जितमा मेसौकेले दुई गोल गरे । यस्तै सुवास गुरुङ, टिका राज गुरुङ र रोशन पहाडीले एक एक गोल गरे । संकटाले एक गोल आत्मघाती गोलको उपहार पाएको थियो । सरस्वतीका काजिम बुसारीले दुई गोल फर्काए । सरस्वतीका पूर्ण बहादुर श्रेष्ठले आत्मघाती गोल गरे ।
लिगकै सर्वाधिक धेरै गोल निस्किएको खेलको पहिलो हाफमै संकटाले ३–० को अग्रता बनाएको थियो । खेलको पाँचौं मिनेटमा मेसौकेले गोल गर्दै संकटालाई सुरुवाती अग्रता दिलाए । ३३ औं मिनेटमा मेसौकेले व्यक्तिगत दोस्रो गोल गर्दै संकटालाई २–० को अग्रता दिलाए । त्यसपछि खेलको ३७ औं मिनेटमा सुवासले गोल गर्दै संकटालाई ३–० को अग्रता दिलाएका थिए ।
दोस्रो हाफमा दुवै टोलीबाट थप पाँच गोल निस्कियो । खेलको ५६ औं मिनेटमा टिकाले गोल गर्दै संकटालाई ४–० को अग्रता दिलाए । ६५ औं मिनेटमा सरस्वतीका पुर्ण बहादुर श्रेष्ठले आत्मघाती गोल गर्दा संकटा ५–० को बन्यो । खेलको ६६ औं मिनेटमा सरस्वतीका बुसारीले गोल गर्दै खेल ५–१ को स्थितिमा ल्याए । ७९ औं मिनेटमा बुसारीले पेनाल्टीबाट व्यक्तिगत दोस्रो गोल खेल ५–२ को बनाए । तर, खेलको ८३ औं मिनेटमा रोशनले गोल गर्दै संकटालाई ६–२ को जित दिलाए ।
अन्तिम खेलमा जित हात पारे पनि संकटा शीर्ष ६ मा पुग्न भने असफल भयो । संकटाले १३ खेलमा १८ अंक जोडेर सातौं स्थानमा रहेको छ । सरस्वतीले भने हारबाट शीर्ष डिभिजन लिगको अन्त्य गर्दै ‘बी’ डिभिजनमा झरेको छ ।
त्यस्तै बिहीबारको दोस्रो खेलमा विभागीय टिम एपीएफ क्लबले अग्रता जोगाउन नसक्दा ब्रिगेड ब्वाइज क्लबसँग अंक बाँड्न बाध्य भएको हो । खेलको ४४ औं मिनेटमा आशिष लामाले गोल गर्दै एपीएफलाई अग्रता दिलाएका थिए । नविन लामाले मिलाएको पासलाई सिक्स यार्ड बक्समा रहेका आशिषले आकर्षक हेड गोल गरे । यस गोलसँगै सर्वाधिक गोलकर्ताको शीर्ष स्थानमा रहेका आशिषले लिगमा ९ गोल पुरा गरेका छन् । तर, पहिलो हाफमा बनाएको अग्रतालाई एपीएफले अन्तिम समयमा भने जोगाउन सकेन । र, खेलको थप गरिएको इन्जुरी समयमा गोल खाएको थियो ।
थप गरिएको समयको तेस्रो मिनेटमा ब्रिगेडका बैकल्पिक खेलाडी विजय गुरुङले गोल गर्दै खेल १–१ को बराबरीमा ल्याएपछि एपीएफले एक अंकले चित्त बुझाएको हो ।
ब्रिगेडसँगको बराबरीसँगै एपीएफले १३ खेलमा ९ अंक जोड्यो । र, एपीएफ यस सिजनको लिगको १२ औं स्थानमा रह्यो । १३ खेलमा ९ अंक नै जोडेको ब्रिगेडले लिगको १३ औं स्थानमा रहँदै सिजनको अन्त्य गरेको छ ।
त्यस्तै बिहीबार सम्पन्न लिगको पहिलो खेलमा जुमानु राइको ह्याट्रिकको मद्धतले नेपाल पुलिस क्लबले सुखद् अन्त्य गरेको छ । पहिलो हाफ गोलरहित बराबरीमा रोकिएको पुलिसले दोस्रो हाफमा भने तीन गोल गर्याे । जसमा वैकल्पिक खेलाडीको रूपमा मैदान प्रवेश गरेका जुमानु नायक बने । खेलको ४९ औं मिनेटमा जुमानुले गोल गर्दै पुलिसलाई अग्रता दिलाए । हेमन्त श्रेष्ठको स्थानमा मैदान प्रवेश गरेका जुमानुले पहिलो आक्रमणमै गोल गरे । उनको यो लिगको पहिलो गोल समेत हो ।
खेलको ५६ औं मिनेटमा जुमानुले व्यक्तिगत दोस्रो गोल गर्दै पुलिसलाई २–० को अग्रता दिलाए । त्यसपछि खेलको ८५ औं मिनेटमा जुमानुले व्यक्तिगत तेस्रो गोल गर्दै ह्याट्रिक पुरा गर्दा पुलिसले ३–० को सहज जित पायो ।
फ्रेन्ड्सविरुद्ध ह्याट्रिक गरेसँगै जुमानु यस सिजनको लिगमा ह्याट्रिक गर्ने दोस्रो खेलाडी बने । यस्तै पुलिसले लिगको शीर्ष ६ पक्का गरेको छ । लिगमा शीर्ष ६ पक्का गरेसँगै पुलिसले अब राष्ट्रिय लिग खेल्ने भएको छ । पुलिस १३ खेलमा २० अंक जोड्दै पाँचौं स्थानमा रहेको छ । फ्रेन्ड्स भने १३ खेलमा १४ अंक जोडेर दशौँ स्थानमा रह्यो ।
