काठमाडौं– प्रमुख प्रतिपक्षी दल नेकपा एमालेको अवरोधका कारण शुक्रबारको प्रतिनिधिसभा बैठक बस्न सकेन । संसद् अवरोध गर्नुको कारण थियो– पशुपतिनाथ मन्दिरमा जलहरी लगाउँदा भ्रष्टाचार भएको भनी नेकपा माओवादी केन्द्रका सांसद लेखनाथ दाहालले दिएको अभिव्यक्ति ।
१० जेठको प्रतिनिधिसभा बैठकमा उनले ‘पशुपतिनाथको जलहरी लाउँदा पनि सुन लाउने भनेर पित्तल लाइदिएर गरेका भ्रष्टाचार’ भनेका थिए । एमाले अध्यक्ष ओली प्रधानमन्त्री हुँदा विभिन्न भ्रष्टाचारका घट्ना भएको उल्लेख गर्ने क्रममा दाहालले सो अभिव्यक्ति दिएका थिए । एमाले सांसदहरुले दाहालको उक्त अभिव्यक्तिप्रति आपत्ति जनाउँदै शुक्रबार संसद् बैठक अवरुद्ध पारेका हुन् ।
एमाले सांसदहरूले बैठकको प्रारम्भमै आसनबाट उभिएर पशुपतिनाथ मन्दिरमा लगाइएको जलहरी सुन कि पित्तल भन्ने सरकारले स्पष्ट जवाफ नदिएसम्म सदन अघि बढ्न नदिने भन्दै बैठक अवरुद्ध गरेका थिए । बैठकमा एमालेका प्रमुख सचेतक पदम गिरीले आफ्ना पार्टी अध्यक्ष केपी शर्मा ओली प्रधानमन्त्री भएका बेला पशुपतिनाथको जलहरीमा सुनको सट्टा पित्तल लगाइएको र भ्रष्टाचार भएको भनी आरोप लगाएकाले त्यसबारे सरकारको स्पष्ट जवाफ नआउँदासम्म सदन अघि नबढ्ने बताएका थिए ।
– पशुपतिनाथ मन्दिरमा जलहरी लगाउँदा भ्रष्टाचार भएको माओवादी सांसदको आरोप
– एमालेलाई बद्नाम गराउन खोजेको भन्दै एमाले सांसदहरुद्वारा प्रतिनिधिसभा बैठक अवरुद्ध
– आरोप पुष्टि हुने कुनै आधार नभएको एमाले अध्यक्ष ओलीको दाबी
– आरोपबारे सरकारले जवाफ दिनुपर्ने ओलीको माग
– माफी नमागेसम्म संसद् चल्न नदिने अडान, छानबिन समिति बनाउन माओवादीको माग
सभामुख घिमिरेले आसनग्रहण गर्न पटकपटक आग्रह गर्दै बैठक संसदीय प्रक्रियाअनुसार अघि बढाउनका लागि सहयोग गर्न आग्रह गरे पनि एमालेका सांसदहरूले रोस्ट्रम घेराउ गर्नुका साथै नाराबाजी गरेका थिए ।
बजेट अधिवेशनजस्तो महत्वपुर्ण समयमा संसद् अवरुद्ध गरेर एमालेले गैरजिम्मेवारीपन देखाएको छ । अपराह्न बसेको बैठक एमाले सांसदहरुले नारावाजीसहित अवरुद्ध पारेपछि सभामुख देवराज घिमिरेले दिउँसो ३ बजेसम्मका लागि बैठक स्थगित गरेका थिए । उक्त समयमा बैठक बस्न नसकेपछि पुनःअर्काे सूचना टाँस गरी ६ बजेका लागि निर्धारण गरिएको थियो । त्यसबीचमा सभामुखले सहमतिका लागि सर्वदलीय बैठक राखे । तर, दलहरु आ–आफ्नो अडानमा रहँदा सहमति जुट्न सकेन र प्रतिनिधिसभा बैठक आज (शनिबार) ४ बजेसम्मका लागि स्थगित हुन पुग्यो ।
त्यसो त माओवादी सांसद दाहालले उठाएको विषय नयाँ भने होइन । महालेखापरीक्षकको कार्यालयले समेत यस विषयमा प्रश्न उठाइसकेको छ । महालेखापरीक्षकको ५९औं वार्षिक प्रतिवेदनमा सुन प्रयोग भए÷नभएको पुष्टि हुने कुनै कागजात पशुपति क्षेत्र विकास कोषबाट पेस नभएको उल्लेख गरिएको छ । प्रतिवेदनमा १० किलोभन्दा बढी सुनबाट रिङ बनेको बिल पेस नभएको, कालिगडलाई लागेको खर्चको विवरणसमेत पेस नभएको, सुन खरिदमा ८० करोड रुपैयाँ लागेको तर दाताले व्यहोरेको रकमको हिसाब लेखांकन नगरिएको औंल्याइएको छ ।
एमालेले उक्त विषयमा माफी माग्नुपर्ने अडान राखेको छ । तर, माओवादी केन्द्रले भने माफी नमाग्ने बरु छानबिन समिति गठन गर्ने प्रस्ताव गरेको थियो । त्यसमा एमाले सहमत तयार भएन । एमाले अध्यक्ष ओली स्वयंले पनि आरोप पुष्टि नहुने दाबी गरे । उनले एमालेलाई बद्नाम गराउन खोजेको बताए । संसद् बैठक अवरुद्ध गर्नु उचित भएकोसमेत उनले दाबी गरे ।
‘आज संसद् अवरुद्ध भइरहेको छ । अस्तिका दिनमा एकजना माओवादी सांसदले बोल्दा कोभिडको औषधिमा दुई अर्ब केपी ओलीले खायो, पशुपतिमा सुनको जलहरी चढाउँछु भनेर पित्तलको चढाएर भ्रष्टाचार ग¥यो भनेर बोले,’ पार्टीका स्थानीय तहका जनप्रतिनिधि अनुशिक्षण कार्यक्रमलाई सम्बोधन गर्दै शुक्रबार ओलीले भने, ‘त्यस विषयमा पुष्टि हुने कुनै आधार छैन । त्यसैले संसद् अवरुद्ध हुनैपर्छ ।’
यता माओवादी सांसद दाहालले भने संसद् अवरुद्ध गर्नुभन्दा छानविन समिति बनाएर सत्यतथ्य बाहिर ल्याउनुपर्ने बताए । उनले आफूले उक्त विषय उठाएर संसदीय मर्यादा उल्लंघन नगरेकोसमेत बताए ।
तत्कालीन प्रधानमन्त्री वलीको पालामा बनाइएको जलहरी राष्ट्रपति विद्यादेवी भण्डारीले पशुपतिलाई लगाइदिएकी थिइन् ।
