काठमाडौं– नेपाली फिल्म क्षेत्रकी अभिनेत्री तथा मोडल महिमा सिलवालको सवारी दुर्घटनामा निधन भएको छ । बुधबार साँझ काठमाडौंबाट आफुनी दिदी शर्मिला सिलवालसँग चितवन जाँदै गर्दा उनीहरू दुर्घटनामा परेका थिए ।
धादिङको गजुरी गाउँपालिका–२ चाम्बासस्थित पृथ्वीलोकमार्गमा भैरहवाबाट काठमाडौंतर्फ आउँदै गरेको लु२ख १३५ नम्बरको बसले महिमा र शर्मिला सवार बा९८प ७०५८ नम्बरको स्कुटरलाई ठक्कर दिएको थियो । दर्घटनामा गम्भीर घाइते भएपछि उपचारका लागि प्राथामिक स्वास्थ्य केन्द्र गजुरी पठाइएकामा घाइते महिमाको उपचारको क्रममा मृत्यु भएको थियो । घाइते शर्मिलाको काठमाडौंस्थित ट्रमा सेन्टरमा उपचारका क्रममा मृत्यु भएको प्रहरीले जनाएको छ ।
चितवनको भरतपुर महानगरपालिका–१३ गीतानगर निवासी शर्मिला र महिमा घर जाँदै थिए । चितवनमा ‘इन्गेजमेन्ट’का लागि जाँदै गर्दा दुर्घटना भएको थियो । पारिवारित स्रोतका अनुसार दुर्घटनामा निधन भएकी अभिनेत्रीको महिमाको ‘इन्गेजमेन्ट’ हुनेवाला थियो ।
मोडलसमेत रहेकी अभिनेत्री महिमाले मिसन–२४, दानव, जिग्लोलगायत विभिन्न नेपाली फिल्म र दर्जनभन्दा बढी म्युजिक भिडियोमा अभिनय गरिसकेकी छन् । उनी पछिल्लो समय म्युजिक भिडियोमा व्यस्त थिइन् ।
ठक्कर दिने बस प्रहरीले नियन्त्रणमा लिएको छ भने फरार बस चालकको खोजी भइरहेको जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रूपक खड्काले जानकारी दिएका छन् ।
